PM Modi in Cyprus | पंतप्रधान नरेंद्र मोदी (PM Modi) यांना सायप्रसच्या (Cyprus) अधिकृत दौऱ्यादरम्यान त्या देशाचा सर्वोच्च नागरी सन्मान ‘द ग्रँड क्रॉस ऑफ द ऑर्डर ऑफ मकारिओस III’ प्रदान करण्यात आला. हा सन्मान स्वीकारताना मोदींनी तो भारत आणि सायप्रस यांच्यातील मैत्रीचे प्रतीक असल्याचे सांगितले.
“हा सन्मान माझ्यासाठी नाही, तर १.४ अब्ज भारतीयांचा आहे. यामुळे भारताची संस्कृती, मूल्ये आणि ‘वसुधैव कुटुंबकम्’ या तत्त्वाला मान्यता मिळाली आहे,” असे ते म्हणाले.
सायप्रसचे अध्यक्ष निकोस क्रिस्टोडौलाइड्स यांनी विमानतळावर मोदींचे स्वागत केले. गेल्या दोन दशकांत कोणत्याही भारतीय पंतप्रधानाचा सायप्रसला हा पहिलाच दौरा आहे. या दौऱ्याने दोन्ही देशांमधील संबंधांना नवे बळ मिळाले आहे. मोदींनी सायप्रससोबत शांतता, सुरक्षा आणि समृद्धीसाठी भारताच्या वचनबद्धतेवर भर दिला.
भारत-सायप्रस आर्थिक सहकार्याला चालना
भारत-सायप्रस सीईओ फोरमला संबोधित करताना मोदींनी भारत, सायप्रस आणि ग्रीस बिझनेस अँड इन्व्हेस्टमेंट कौन्सिलच्या स्थापनेचे कौतुक केले. “हा एक उत्तम उपक्रम आहे. यामुळे त्रिपक्षीय आर्थिक सहकार्याला चालना मिळेल,” असे त्यांनी सांगितले. फोरममधील सूचना प्रत्यक्ष कृती योजनांद्वारे पुढे नेल्या जातील, अशी ग्वाही त्यांनी दिली.
मोदींनी सायप्रस स्टॉक एक्सचेंज आणि भारताच्या नॅशनल स्टॉक एक्सचेंज यांच्यातील सहकार्याचा उल्लेख केला. गुजरातच्या गिफ्ट सिटीमध्ये हे सहकार्य होणार आहे. सायप्रसच्या गुंतवणूकदारांना भारतातील ऊर्जा, तंत्रज्ञान आणि नवोपक्रम क्षेत्रातील संधींचा लाभ घेण्याचे आवाहन त्यांनी केले.
‘एक्स’वर एका पोस्टमध्ये मोदींनी लिहिले, “भारत आणि सायप्रस यांच्यातील व्यापार संबंध मजबूत करण्यासाठी अध्यक्ष क्रिस्टोडौलाइड्स यांच्यासोबत सीईओंशी चर्चा झाली. ऊर्जा, तंत्रज्ञान आणि नवोपक्रमात प्रचंड क्षमता आहे. गेल्या दशकातील भारताच्या सुधारणांबद्दलही मी बोललो.”
