Rahul Gandhi Vote Theft Allegations : काँग्रेस खासदार राहुल गांधी यांनी हरियाणा विधानसभा निवडणुकीत ‘मत चोरी’ झाल्याचा नवा आरोप करत पत्रकार परिषदेत ब्राझीलियन मॉडेलचा फोटो दाखवला आणि या फोटोने एकच खळबळ उडवली. हरियाणामधील मतदार यादीत हा फोटो 22 वेळा वापरला गेल्याचा राहुल गांधींनी दावा केला होता.
या फोटोमध्ये असलेली महिला लारिसा (Larissa) हिने आता प्रतिक्रिया दिली असून, तिला स्वतःलाच आश्चर्याचा धक्का बसला आहे. हा फोटो तिच्या सुरुवातीच्या मॉडेलिंगच्या दिवसांतील एक जुना स्टॉक फोटो असल्याचे तिने स्पष्ट केले. “माझा भारताच्या राजकारणाशी काहीही संबंध नाही,” असे तिने व्हिडिओमध्ये सांगितले.
लारिसाची प्रतिक्रिया
लारिसाने खुलासा केला की, तिचा हा फोटो एका स्टॉक इमेज प्लॅटफॉर्मवरून विकत घेण्यात आला होता आणि तिचा कोणताही सहभाग नसताना तो वापरला गेला. “मी कधीही भारतात आलेली नाही. मी एक ब्राझीलियन डिजिटल इन्फ्लुएंसर आणि हेअरड्रेसर आहे. मला भारतीय लोक खूप आवडतात,” असे ती म्हणाली.
राहुल गांधींनी तिचा फोटो वापरल्यापासून तिच्या इन्स्टाग्रामवर भारतीयांच्या कमेंट्सचा पूर आला आहे. अनेक भारतीय तिला ‘निवडून आलेली’ समजून शुभेच्छा देत होते.
लारिसा म्हणाली, “माझा फोटो वापरला गेला, मी नाही! पण माझ्या कथा पाहणाऱ्या, भारतीय माध्यमांना त्या भाषांतर करून देणाऱ्या आणि शेअर करणाऱ्या सर्व भारतीयांचे मी मनापासून आभार मानते.” लोकप्रिय होण्यासाठी आपण काही भारतीय शब्द शिकणार आहोत, असे ती मजेत म्हणाली.
राहुल गांधींचे नवे आरोप
राहुल गांधींनी ‘एच-फाईल्स’ (‘H-Files’) नावाचे एक प्रेझेंटेशन सादर करत 2024 ची हरियाणा विधानसभा निवडणूक ‘चोरी’ झाली असल्याचा आरोप केला. 25 लाख मतदारांच्या नोंदी बनावट असून, भाजपला विजय मिळवून देण्यासाठी निवडणूक आयोगाने (Election Commission) मदत केल्याचा त्यांनी दावा केला.
त्यांनी हरियाणामधील मतदार यादीचा हवाला देत सांगितले की, 25,41,144 बनावट मतदार, 5,21,619 दुप्पट मतदार (Duplicate Voters), 93,174 अवैध पत्ते (Invalid Addresses) आणि 19,26,351 बल्क मतदार (Bulk Voters) आहेत.
त्यांच्या दाव्यानुसार, एका ‘केंद्रीय नियोजित योजने’ अंतर्गत राय विधानसभा मतदारसंघातील 10 मतदान केंद्रांवर लारिसाचा स्टॉक फोटो 22 वेळा ‘सीमा’, ‘स्वीटी’ आणि ‘सरस्वती’ अशा नावांनी वापरला गेला होता.
आयोगाकडून आरोपांचे खंडन
निवडणूक आयोगाने (Election Commission) राहुल गांधींचे आरोप फेटाळले असून, राज्याच्या मतदार यादीवर एकही अपील दाखल झालेले नाही, असे स्पष्ट केले. तसेच, दुप्पट नोंदी असल्या तरी, अशा मतदारांनी भाजपलाच मत दिले, हे राहुल गांधी कसे काय ठामपणे सांगू शकतात, असा उलट प्रश्न आयोगाने उपस्थित केला.
भाजपनेही हे आरोप ‘खोटे आणि निराधार’ ठरवत, काँग्रेस नेत्याने आपले अपयश लपवण्यासाठी देशाच्या लोकशाहीची बदनामी करण्याचा प्रयत्न केल्याचे म्हटले आहे.
हे देखील वाचा – किंमत फक्त 15 हजार रुपयांपासून! लाँच झाला Moto चा शानदार 5G स्मार्टफोन; मिळेल 7000mAh बॅटरी
