Republic Day 2026: नवी दिल्लीतील कर्तव्य पथावर २६ जानेवारी २०२६ रोजी होणाऱ्या ७७ व्या प्रजासत्ताक दिन संचलनासाठी केंद्र सरकारने एक मोठी घोषणा केली आहे. ‘जनभागीदारी’ ही संकल्पना अधिक दृढ करण्यासाठी देशभरातील विविध क्षेत्रांतील १०,००० विशेष पाहुण्यांना त्यांच्या जोडीदारासह या सोहळ्याचे साक्षीदार होण्यासाठी निमंत्रित करण्यात आले आहे.
जारी करण्यात आलेल्या अधिकृत पत्रकानुसार, राष्ट्र उभारणीत मोलाचे योगदान देणाऱ्या सामान्य नागरिकांना सन्मानित करणे हा या उपक्रमाचा मुख्य उद्देश आहे.
पाहुण्यांच्या यादीत कोणाकोणाचा समावेश?
या विशेष निमंत्रितांमध्ये केंद्र सरकारच्या विविध महत्त्वाकांक्षी योजनांचे लाभार्थी आणि यशवंतांचा समावेश आहे:
- महिला शक्ती: लखपती दीदी, महिला बचत गटांच्या सदस्या, महिला कॉयर आणि ‘पीएम विश्वकर्मा’ योजनेअंतर्गत प्रशिक्षित कारागीर.
- कृषी क्षेत्र: नैसर्गिक शेती करणारे शेतकरी, कडधान्य स्वावलंबन मोहिमेतील लाभार्थी आणि जल जीवन मिशनचे प्रतिनिधी.
- तंत्रज्ञान आणि विज्ञान: इस्रोच्या (ISRO) गगनयान आणि चांद्रयान मोहिमेतील शास्त्रज्ञ, डीआरडीओचे (DRDO) तज्ज्ञ आणि स्टार्टअप उद्योजक.
- समाजसेवक: अंगणवाडी सेविका, ‘माय भारत’चे स्वयंसेवक, सीमा रस्ते संघटनेतील बांधकाम कामगार आणि नॅशनल मिशन फॉर क्लीन गंगा अंतर्गत कार्य करणारे ‘जल रक्षक’.
आदिवासी आणि ग्रामीण नेतृत्वाचा सन्मान
आदिवासी समाजातील नेते आणि ‘पीएम जनमन’ योजनेचे लाभार्थी, तसेच केंद्र सरकारच्या योजनांची १०० टक्के अंमलबजावणी करणाऱ्या ग्रामपंचायतींचे सरपंच यांनाही विशेष निमंत्रण धाडण्यात आले आहे. याशिवाय ‘वीर गाथा’ प्रकल्पाचे विजेते आणि आंतरराष्ट्रीय ऑलिम्पियाडमधील गुणवंत विद्यार्थ्यांचाही यात सहभाग असेल.
आंतरराष्ट्रीय पाहुणे आणि बौद्ध शिष्टमंडळ
या सोहळ्याला परदेशी प्रतिनिधींसोबतच २०२६ च्या दुसऱ्या जागतिक बौद्ध शिखर परिषदेला उपस्थित राहणारे भारतीय आणि आंतरराष्ट्रीय भिक्खूंचे शिष्टमंडळही उपस्थित राहणार आहे. खगोलशास्त्र आणि खगोलभौतिकी ऑलिम्पियाडमधील पदक विजेत्यांनाही परेड पाहण्याची संधी मिळणार आहे.
दिल्ली दर्शन आणि केंद्रीय मंत्र्यांशी संवाद
दिल्लीत येणाऱ्या या विशेष पाहुण्यांसाठी केवळ परेडच नाही, तर राष्ट्रीय युद्ध स्मारक आणि ‘पीएम संग्रहालय’ पाहण्याची व्यवस्थाही करण्यात आली आहे. आपल्या दौऱ्यादरम्यान या पाहुण्यांना केंद्रीय मंत्र्यांशी थेट संवाद साधण्याची संधीही मिळणार आहे. सामान्य नागरिकांचा राष्ट्रीय उत्सवातला सहभाग वाढवण्यासाठी उचललेले हे पाऊल अत्यंत महत्त्वाचे मानले जात आहे.
