S Jaishankar UN Speech: संयुक्त राष्ट्र संघटनेला (United Nations) 80 वर्षे पूर्ण झाल्यानिमित्त आयोजित एका कार्यक्रमात परराष्ट्र व्यवहार मंत्री (EAM) डॉ. एस. जयशंकर यांनी आंतरराष्ट्रीय संस्थेच्या कार्यपद्धतीवर गंभीर चिंता व्यक्त केली आहे.
“संयुक्त राष्ट्र संघटनेच्या कार्यप्रणालीत सगळे काही व्यवस्थित नाही,” असे परखड मत त्यांनी व्यक्त केले. वर्धापन दिनाचे पोस्टाचे तिकीट जारी करताना ते बोलत होते. संयुक्त राष्ट्र संघाच्या स्थापनेच्या 80व्या वर्धापनदिनानिमित्त राजधानी दिल्लीमध्ये विशेष कार्यक्रम आयोजित करण्यात आला.
जयशंकर यांनी स्पष्ट केले की, सध्याच्या जागतिक समस्या आणि प्राधान्यक्रम यांचा कोणताही थेट संबंध संयुक्त राष्ट्र संघटनेच्या निर्णयांमध्ये दिसून येत नाही. सध्या जगात संघर्ष असताना शांततेची नितांत गरज आहे, पण या संघटनेतील चर्चा अधिकाधिक ध्रुवीकरण झालेल्या आणि जमिनीवरील वास्तवापासून दूर गेलेल्या आहेत.
सुधारणेच्या प्रक्रियेतच अडथळे
या जागतिक संस्थेच्या भविष्यावर बोलताना जयशंकर यांनी ‘अर्थपूर्ण सुधारणां’ची मागणी अधिक तीव्र केली. ते म्हणाले की, “सुधारणा करण्याची अत्यंत तातडीची गरज असतानाही, सुधारणा घडवून आणण्याची जी प्रक्रिया आहे, तिचाच वापर बदलांना रोखण्यासाठी केला जात आहे.”
भारत, ब्राझील (Brazil) आणि आफ्रिकन युनियनसारख्या प्रमुख राष्ट्रांकडून संयुक्त राष्ट्र सुरक्षा परिषदेत (UNSC) सुधारणा करण्याची मागणी जोर धरत आहे. विशेषतः, जागतिक दहशतवादी यादीत काही दहशतवादी संघटनांचा समावेश करण्याच्या भारताच्या प्रयत्नांना अनेकदा चीनसारख्या स्थायी सदस्यांकडून नकाराधिकारामुळे अडथळे आले आहेत.
भारताला लक्ष्य करणाऱ्यांवर टीका
संयुक्त राष्ट्राच्या व्यासपीठावरून भारताविरुद्ध होणाऱ्या अनावश्यक टीकेचा संदर्भही जयशंकर यांनी दिला. काही आठवड्यांपूर्वीच स्वित्झर्लंडने भारताच्या अभिव्यक्ती स्वातंत्र्य (Freedom of Expression) आणि माध्यमांच्या अधिकारांवर प्रश्नचिन्ह उभे केले होते. यावर भारताने स्वित्झर्लंडला त्यांच्या देशातील वंशभेद (Racism) आणि भेदभावासारख्या अंतर्गत समस्यांवर लक्ष देण्याचा सल्ला दिला होता.
पाकिस्तानकडून काश्मीरचा मुद्दा वारंवार संयुक्त राष्ट्रात उपस्थित केला जात असताना, जयशंकर यांचे हे विधान महत्त्वाचे मानले जात आहे. त्यांनी ठामपणे सांगितले की, भारत नेहमीच संयुक्त राष्ट्रांना पाठिंबा देत राहील, परंतु या संघटनेचे निर्णय जगाच्या गरजा प्रतिबिंबित करत नाहीत.
हे देखील वाचा – Donald Trump : रशियातील तेल खरेदीत भारत कपात करणार; ट्रम्प यांचा पुन्हा दावा
