Share Market : भारतीय शेअर बाजाराने आजच्या व्यवहारात चढ-उतारांचा प्रवास अनुभवला आणि अखेरीस किरकोळ घसरणीसह बंद झाला. दिवसभर तेजी आणि घसरण यांचा खेळ सुरू राहिल्यानंतर बीएसई सेन्सेक्स ४०.२८ अंकांनी घसरून ८४,२३३.६४ अंकांवर स्थिरावला. राष्ट्रीय शेअर बाजाराचा निफ्टी निर्देशांकही १८.७० अंकांनी घसरत २५,९५३.८५ अंकांवर बंद झाला. जागतिक बाजारांकडून मिळालेल्या संमिश्र संकेतांच्या पार्श्वभूमीवर निफ्टीने व्यवहारादरम्यान २६ हजारांचा टप्पा पार केला होता; मात्र त्यानंतर विक्रीचा दबाव वाढल्याने निर्देशांकात घसरण झाली. अमेरिकेतील रोजगारविषयक अहवालाकडे गुंतवणूकदारांचे विशेष लक्ष लागून राहिले आहे, त्याचा परिणामही बाजाराच्या हालचालींवर दिसून आला.
क्षेत्रनिहाय पाहता, ऑटो निर्देशांकात सर्वाधिक तेजी नोंदविण्यात आली. निफ्टी फार्मा आणि सार्वजनिक क्षेत्रातील बँक (पीएसयू बँक) निर्देशांक सुमारे १ टक्क्यांनी वधारले. याउलट आयटी निर्देशांकात १.७ टक्क्यांची घसरण झाली. निफ्टी मिडकॅप आणि स्मॉलकॅप निर्देशांक दिवसभरातील चढ-उतारांनंतर जवळपास स्थिर राहिले.
बीएसईवर सूचीबद्ध कंपन्यांचे एकूण बाजारमूल्य ४७४.८९ लाख कोटी रुपयांवर पोहोचले. मंगळवारी हेच बाजारमूल्य ४७४.४८ लाख कोटी रुपये होते. म्हणजेच एका दिवसात सुमारे ४१ हजार कोटी रुपयांची वाढ नोंदवली गेली असून, त्यातून गुंतवणूकदारांच्या संपत्तीत तितकीच भर पडल्याचे दिसून येते.
सेन्सेक्समधील ३० प्रमुख कंपन्यांपैकी १४ शेअर्स तेजीने तर १६ शेअर्स घसरणीसह बंद झाले. स्टेट बँक ऑफ इंडियाच्या शेअरमध्ये सर्वाधिक वाढ दिसून आली. याशिवाय मारुती सुझुकी, इंडिगो, ट्रेंट आणि रिलायन्स इंडस्ट्रीज यांच्या शेअर्समध्येही सकारात्मक हालचाल नोंदली गेली. दुसरीकडे, टीसीएस, इन्फोसिस, एचसीएल टेक, इटरनल आणि आयटीसी यांच्या शेअर्समध्ये लक्षणीय घसरण झाली. एकूण ४,३८३ शेअर्समध्ये व्यवहार झाला; त्यापैकी १,९७१ शेअर्स वाढीसह, २,२५१ शेअर्स घसरणीसह तर १६१ शेअर्स स्थिर पातळीवर बंद झाले.
(टीप: शेअर बाजार आणि म्युच्युअल फंडांमधील गुंतवणूक ही बाजारजोखमीच्या अधीन असते. वरील माहिती ही केवळ सामान्य स्वरूपाची असून ती गुंतवणुकीचा सल्ला म्हणून घेऊ नये.)
