US F-15E fighter jets friendly fire Kuwait : इराणविरुद्ध सुरू असलेल्या ‘ऑपरेशन एपिक फ्युरी’ दरम्यान एक धक्कादायक घटना समोर आली आहे. अमेरिकेची तीन शक्तिशाली ‘F-15E स्ट्राईक ईगल’ लढाऊ विमाने कुवेतच्या हवाई संरक्षण दलाने चुकून पाडली आहेत.
अमेरिकेच्या सेंट्रल कमांडने (CENTCOM) या ‘फ्रेंडली फायर’ घटनेची पुष्टी केली. या घटनेमुळे पश्चिम आशियातील युद्धभूमीवर मित्रराष्ट्रांमधील समन्वयाचा अभाव दिसून आला आहे.
नेमकी घटना काय?
अमेरिकेची ही विमाने कुवेतच्या आकाशातून मोहिमेवर असताना कुवेती संरक्षण दलाने त्यांना शत्रूचे विमान समजून लक्ष्य केले. सोशल मीडियावर व्हायरल झालेल्या व्हिडिओंमध्ये एक विमान आगीच्या गोळ्यासारखे खाली कोसळताना दिसत आहे. सुदैवाने, तिन्ही विमानांमधील एकूण 6 वैमानिक वेळेत बाहेर पडले असून त्यांची प्रकृती स्थिर आहे. कुवेतने या चुकीची कबुली दिली असून अमेरिकेने त्यांच्या बचावकार्याबद्दल आभार मानले आहेत.
इराणचा जोरदार पलटवार
अमेरिका आणि इस्रायलने इराणच्या लष्करी तळांवर केलेल्या हल्ल्यांनंतर इराणनेही भीषण प्रत्युत्तर दिले आहे. इराणचे सर्वोच्च नेते अयातुल्ला अली खामेनी यांचा पहिल्याच दिवशी मृत्यू झाल्याने इराण अधिक आक्रमक झाला आहे.
इराणने इस्रायलची राजधानी तेल अवीव आणि अमेरिकेच्या लष्करी तळांवर क्षेपणास्त्रांचा आणि ड्रोनचा वर्षाव केला. जेरुसलेममध्येही एअर रेड सायरन वाजले असून मोठ्या स्फोटांचे आवाज ऐकू आले आहेत.
तेल बाजारावर परिणाम आणि नागरी नुकसान
- सौदी अरामकोवर हल्ला: इराणच्या ड्रोन हल्ल्यात सौदी अरेबियाचा ‘रास तनुरा’ तेल शुद्धीकरण प्रकल्प आगीच्या विळख्यात सापडला असून तो तात्पुरता बंद करण्यात आला आहे. यामुळे जागतिक तेल बाजारात मोठी खळबळ उडाली आहे.
- दुबई विमानतळ ठप्प: जगातील सर्वात व्यस्त मानले जाणारे दुबई विमानतळ युद्धाच्या धोक्यामुळे अनेक तास बंद ठेवण्यात आले होते.
- नागरी वस्त्यांचे नुकसान: इराणच्या क्षेपणास्त्राने दुबईतील एका आलिशान हॉटेलला लक्ष्य केले, तर इराणने असा दावा केला आहे की अमेरिका-इस्रायलच्या हल्ल्यात मिनाबमधील एका शाळेवर क्षेपणास्त्र पडल्याने 160 हून अधिक मुलांचा मृत्यू झाला आहे.
पश्चिम आशियातील हा संघर्ष आता केवळ दोन देशांपुरता मर्यादित न राहता संपूर्ण प्रदेशाला युद्धाच्या खाईत लोटत आहे.
