Epstein Files | अमेरिकेचे राष्ट्राध्यक्ष डोनाल्ड ट्रम्प (Donald Trump) आणि इलॉन मस्क (Elon Musk) यांच्यातील जाहीर शाब्दिक वाद सध्या चर्चेचा विषय ठरला आहे. मस्क यांनी ट्रम्प यांच्यावर आरोप करत एपस्टाईन फाइल्समध्ये त्यांचे नाव असल्याचे म्हटले आहे.
या आरोपामुळे अमेरिकेच्या राजकारणात जेफ्री एपस्टाईन (Jeffrey Epstein) हे नाव पुन्हा चर्चेत आले आहे. जेफ्री एपस्टाईन हा मृत आणि दोषी ठरलेला लैंगिक गुन्हेगार होता. मस्क यांनी आरोप केला की, या प्रकरणाशी संबंधित फाइल्स कधीही सार्वजनिक केल्या गेल्या नाहीत, कारण त्यात ट्रम्प यांचे नाव होते.
ट्रम्प यांनी आणलेल्या एका विधेयकावरून दोघांमधील संबंध ताणले गेले असून, आता दोघेही जण एकमेकांवर वैयक्तिक आरोप करताना दिसत आहे. चर्चेत आलेले एपस्टाईन फाइल्स प्रकरण काय, ते जाणून घेऊयात.
एपस्टाईन फाइल्स प्रकरण काय?
गेल्या काही महिन्यांपासून ट्रम्प प्रशासनाला एपस्टाईन फाइल्स (Epstein Files) सार्वजनिक करण्याची विनंती केली जात आहे. यामध्ये जेफ्री एपस्टाईनच्या प्रकरणाशी संबंधित उर्वरित कागदपत्रांचा समावेश आहे. एपस्टाईन 2019 मध्ये न्यूयॉर्कमधील एका फेडरल तुरुंगात मृत आढळला होता.
हे एपस्टाईन आणि त्याच्या साथीदारांविरुद्ध अनेक फौजदारी खटल्यांवर काम करणाऱ्या तपासकर्त्यांनी ठराविक कालावधीत गोळा केलेल्या पुराव्यांचा संग्रह आहे. यापैकी काही फाइल्स यापूर्वीही प्रसिद्ध करण्यात आल्या होत्या.
या वर्षी जानेवारीमध्ये डोनाल्ड ट्रम्प हे व्हाईट हाऊसमध्ये परतल्यानंतर, अमेरिकेच्या न्याय विभागाने फेब्रुवारीमध्ये या प्रकरणाशी संबंधित अतिरिक्त फाइल्स प्रसिद्ध केल्या. त्यात म्हटले होते की, हे मुख्यतः “यापूर्वी लीक झालेले परंतु अमेरिकन सरकारने औपचारिकपणे कधीही प्रसिद्ध न केलेले दस्तऐवज” होते.
जेफ्री एपस्टाईन आणि डोनाल्ड ट्रम्प यांची मैत्री
ट्रम्प-एपस्टाईन यांची मैत्री 1990 च्या दशकातील आहे. 1992 मधील एका क्लिपमध्ये ट्रम्प मार-ए-लागो इस्टेटमध्ये ‘कॅलेंडर गर्ल’ स्पर्धा आयोजित करताना दिसले होते. ही क्लिप इलॉन मस्क यांनी एक्सवर शेअर केली होती. त्यात ते डान्स फ्लोअरवरील महिलांना दाखवताना दिसत आहेत. 1990 च्या दशकात ट्रम्प यांनी एपस्टाईनच्या खाजगी विमानातून अनेक वेळा प्रवास केला होता, असे एपस्टाईनची वारसदार घिसलेन मॅक्सवेल (Ghislaine Maxwell) हिच्याशी संबंधित प्रकरणात प्रसिद्ध झालेल्या कागदपत्रांमध्ये नमूद आहे. मॅक्सवेल सध्या लहान मुली आणि महिलांना लक्ष्य करून लैंगिक अत्याचार करण्यास मदत केल्याबद्दल 20 वर्षांची तुरुंगवासाची शिक्षा भोगत आहे.
2002 मध्ये न्यूयॉर्क मासिकाला दिलेल्या मुलाखतीत ट्रम्प यांनी सांगितले होते की, ते एपस्टाईनला 15 वर्षांपासून ओळखत होते आणि त्याला “उत्तम माणूस” म्हटले होते. एपस्टाईनचे कौतुक देखील केले होते.
2019 मध्ये एपस्टाईनला पुन्हा अटक झाल्यावर अमेरिकेच्या राष्ट्राध्यक्षांनी त्याच्यापासून स्वतःला दूर केले. मला वाटत नाही की मी त्याच्याशी 15 वर्षांपासून बोललो आहे. मी त्याचा चाहता नव्हतो,” असे ते म्हणाले होते. रिपोर्टनुसार, फ्लोरिडामध्ये रिअल इस्टेटच्या स्पर्धेत 2004 मध्ये दोघांमध्ये वाद झाला होता.
जेफ्री एपस्टाईन कोण होता?
जेफ्री एपस्टाईन हा सेलिब्रिटी आणि राजकारण्यांशी असलेल्या संबंधांसाठी प्रसिद्ध होता. 2005 मध्ये त्याला पाम बीच, फ्लोरिडामध्ये 14 वर्षांच्या मुलीला लैंगिक संबंधांसाठी पैसे दिल्याबद्दल सुरुवातीला ताब्यात घेण्यात आले. नंतर अनेक अल्पवयीन मुलींनी अशाच लैंगिक शोषणाच्या घटनांचे वर्णन केले.
जुलै 2019 मध्ये त्याला पुन्हा अटक करण्यात आली आणि त्याच्यावर गंभीर गुन्हे दाखल करण्यात आले. त्या आरोपांवर खटला सुरू असतानाच तुरुंगातील कोठडीत त्याचा कथितपणे आत्महत्येने मृत्यू झाला.
