Who is Tarique Rahman: बांगलादेशातील सत्तेचा संघर्ष आता संपला असून ‘बांगलादेश नॅशनलिस्ट पार्टी’ने (BNP) ऐतिहासिक विजय मिळवला आहे. या विजयाचे शिल्पकार आणि देशाचे भावी पंतप्रधान म्हणून तारिक रहमान यांचे नाव सध्या जगभरात चर्चेत आहे. १७ वर्षे निर्वासित जीवन जगल्यानंतर मायदेशी परतलेल्या तारिक रहमान यांनी आपल्या नेतृत्वाने पक्षाला पुन्हा एकदा सत्तेच्या शिखरावर नेऊन ठेवले आहे.
कोण आहेत तारिक रहमान?
तारिक रहमान हे बांगलादेशातील सर्वात प्रभावशाली राजकीय घराण्याचे वारसदार आहेत.
- कौटुंबिक पार्श्वभूमी: ते बांगलादेशचे माजी राष्ट्रपती जियाउर रहमान आणि तीन वेळा पंतप्रधान राहिलेल्या बेगम खालिदा झिया यांचे मोठे चिरंजीव आहेत.
- राजकीय वारसा: वडिलांनी स्थापन केलेल्या ‘बीएनपी’ पक्षाची धुरा सध्या ते सांभाळत आहेत. ३० डिसेंबर २०२५ रोजी मातोश्री खालिदा झिया यांच्या निधनानंतर ते अधिकृतपणे पक्षाचे अध्यक्ष बनले.
- राजपुत्र ते जननेता: त्यांना बांगलादेशच्या राजकारणातील ‘क्राउन प्रिन्स’ म्हटले जाते. २००१ ते २००६ च्या काळात सत्तेत नसतानाही त्यांचे प्रशासनावर मोठे वर्चस्व होते.
वनवास ते विजय: कठीण प्रवास
२००७ मध्ये लष्करी समर्थित काळजीवाहू सरकारने त्यांना अटक केली होती. त्यानंतर उपचारासाठी ते लंडनला गेले आणि तब्बल १७ वर्षे तिथेच राहिले. शेख हसीना यांच्या सरकार कोसळल्यानंतर, २५ डिसेंबर २०२५ रोजी ते मायदेशी परतले. त्यांच्यावर असलेले अनेक जुने खटले आता रद्द झाले असून त्यांनी लोकशाही पुनर्रचनेचा नारा दिला आहे.
बहुमताकडे यशस्वी वाटचाल
१२ फेब्रुवारी २०२६ रोजी झालेल्या निवडणुकीत तारिक रहमान यांनी बोगुरा-6 आणि ढाका-17 या दोन्ही मतदारसंघातून दणदणीत विजय मिळवला आहे. प्राथमिक कलानुसार, बीएनपीने ३०० पैकी १९७ जागा जिंकून स्पष्ट बहुमत मिळवले आहे. जमात-ए-इस्लामीला मागे टाकत बीएनपीने ही मुसंडी मारली आहे.
पंतप्रधान पदाचे दावेदार
बीएनपीने आधीच जाहीर केले आहे की, तारिक रहमान हेच त्यांचे पंतप्रधानपदाचे मुख्य उमेदवार असतील. त्यांनी भ्रष्टाचाराचा बिमोड करणे, शिक्षण क्षेत्राचा विकास आणि तरुणांना रोजगाराच्या संधी उपलब्ध करून देण्याचे आश्वासन दिले आहे. मोहम्मद युनूस यांच्या अंतरिम सरकारकडून आता ते सत्तेची सूत्रे आपल्या हाती घेण्याची शक्यता आहे.
