BCCI New Rules for IPL: आयपीएल २०२६ च्या हंगामात भारतीय क्रिकेट नियामक मंडळाने (BCCI) शिस्तीचा बडगा उगारत संघांसाठी नवीन नियमावली जाहीर केली आहे. सामन्यादरम्यान बेंचवर बसलेल्या सर्वच खेळाडूंना आता मैदानात मुक्तपणे संचार करता येणार नाही. खेळाडूंच्या हालचालींवर मर्यादा आणणारा हा निर्णय फ्रँचायझींना कळवण्यात आला असून, यामुळे सामन्यातील शिस्त अधिक कडक होणार आहे.
BCCI New Rules for IPL: केवळ १६ खेळाडूंनाच परवानगी
नवीन नियमानुसार, सामन्यासाठी जाहीर केलेल्या १६ खेळाडूंच्या यादीत (Team Sheet) ज्यांचे नाव आहे, तेच खेळाडू मैदानात पाणी (Drinks), बॅट किंवा संदेश घेऊन जाऊ शकतील. या १६ खेळाडूंच्या यादीत नसलेले संघातील इतर खेळाडू मैदानावर कोणत्याही कामासाठी पाऊल ठेवू शकणार नाहीत. बीसीसीआयने घेतलेला हा निर्णय सामन्यातील विनाकारण होणारा व्यत्यय टाळण्यासाठी असल्याचे समजते.
BCCI New Rules for IPL: बाउंड्री जवळच्या गर्दीवर मर्यादा
मैदानाच्या सीमारेषेजवळ खेळाडूंच्या होणाऱ्या गर्दीवरही आता नियंत्रण आणले गेले आहे.
- ५ खेळाडूंचा नियम: सीमारेषेजवळ जास्तीत जास्त ५ खेळाडू उभे राहू शकतात.
- डगआऊटमध्येच थांबावे लागणार: राखीव खेळाडूंना डगआऊटमध्ये बसण्याची परवानगी असेल, पण त्यांना सीमारेषा आणि एलईडी जाहिरात फलक यांच्यामधील मोकळ्या जागेत फिरता येणार नाही.
- वेळेची बचत: ड्रिंक्स घेऊन जाणाऱ्या खेळाडूंना वेळेचा अपव्यय टाळून आणि योग्य क्रिकेट गणवेशातच मैदानात जावे लागेल.
फ्रँचायझींना मिळालेल्या सूचना
रिपोर्टनुसार, संघांना अलीकडेच या सूचना मिळाल्या आहेत. त्यानुसार, “सर्व राखीव खेळाडू सामन्यादरम्यान मैदानात फिरू शकत नाहीत. केवळ १६ नियुक्त खेळाडूच ड्रिंक्स किंवा इतर वस्तू मैदानात नेऊ शकतात. उर्वरित खेळाडूंनी डगआऊटमध्ये बसणे बंधनकारक आहे,” असे सांगण्यात आले आहे.
बीसीसीआयने यावर्षी सराव सत्राचे नियम, सादरीकरण सोहळ्याचे शिष्टाचार आणि सपोर्ट स्टाफच्या हालचालींबाबतही कडक धोरण अवलंबले आहे. या नवीन बदलांमुळे संघांना मैदानावर आपली रणनीती ठरवताना पूर्वीसारखी लवचिकता मिळणार नाही, परंतु आयपीएलचे स्वरूप अधिक व्यावसायिक आणि शिस्तबद्ध होणार आहे.
हे देखील वाचा
Monsoon 2026 Forecast: ‘अल निनो’मुळे मान्सूनचा खेळ बिघडणार? यंदा किती पाऊस होणार? अंदाज जाहीर
