T20 World Cup 2026 : भारत आणि श्रीलंका यांच्या संयुक्त यजमानपदाखाली पुढील वर्षी होणाऱ्या ICC T20 विश्वचषक 2026 स्पर्धेच्या आयोजनाची तयारी सुरू झाली आहे. रिपोर्टनुसार, ही स्पर्धा 7 फेब्रुवारीपासून सुरू होऊन तिचा अंतिम सामना 8 मार्च रोजी खेळला जाण्याची शक्यता आहे, मात्र ICC कडून अधिकृत घोषणा होणे बाकी आहे.
अहमदाबादमधील नरेंद्र मोदी स्टेडियम आणि कोलकातामधील ईडन गार्डन्स या मैदानांना सेमीफायनल सामन्यांचे यजमानपद मिळण्याची दाट शक्यता आहे. 2016 नंतर प्रथमच T20 विश्वचषक आशियाई उपखंडात परतत आहे.
8 ठिकाणांची निवड आणि 5 भारतीय शहरे
BCCI आणि SLC (श्रीलंका क्रिकेट) यांच्या समन्वयाने ICC ने या स्पर्धेसाठी एकूण 8 ठिकाणे निश्चित केली आहेत. यात भारतातील 5 शहरे मुंबई, दिल्ली, चेन्नई, अहमदाबाद, आणि कोलकाता आणि श्रीलंकेतील 3 शहरांचा (दोन कोलंबोमध्ये आणि एक कँडीमध्ये) समावेश आहे.
पाकिस्तानमुळे अंतिम सामन्याचे ठिकाण अनिश्चित
T20 विश्वचषकाच्या अंतिम सामन्याचे ठिकाण निश्चित करण्याचा निर्णय आयोजकांनी शेवटच्या क्षणासाठी राखून ठेवला आहे. जर स्पर्धेच्या अंतिम टप्प्यात पाकिस्तान संघ पोहोचला, तर अंतिम सामन्याचे ठिकाण बदलले जाऊ शकते.
सेमीफायनलसाठी लवचिक धोरण:
नियोजनाशी संबंधित अधिकाऱ्यांनी स्पष्ट केले आहे की, जर पाकिस्तान किंवा श्रीलंका हे सेमीफायनलसाठी पात्र ठरले, तर तो विशिष्ट सामना कोलंबो येथे हलवला जाईल. मात्र, हे दोन्ही संघ पात्र न झाल्यास, दोन्ही सेमीफायनल सामने भारतात खेळवले जातील. टीमच्या सहभागाच्या आधारावर मैदानात बदल करण्याची लवचिकता ठेवण्यात आली आहे.
सहभागी संघ आणि स्पर्धेचे स्वरूप
20 संघांची ही स्पर्धा 2024 च्या अमेरिका-वेस्ट इंडीज आवृत्तीच्या धर्तीवरच खेळवली जाईल. संघांना 5-5 च्या 4 गटांमध्ये विभागले जाईल. प्रत्येक गटातील अव्वल 2 संघ सुपर एइट मध्ये जातील, आणि तिथून सर्वोत्तम 4 संघ सेमीफायनलमध्ये प्रवेश करतील. गतविजेता भारत या स्पर्धेचे नेतृत्व करेल. इटली आपला पहिला T20 विश्वचषक खेळणार आहे, तर कॅनडा, नेदरलँड्स यांसारखे सहयोगी राष्ट्रही पात्र ठरले आहेत.
