Women’s World Cup 2025: लवकरच एकदिवसीय महिला विश्वचषकाची (Women’s World Cup 2025) सुरुवात होणार आहे. या पार्श्वभूमीवर आंतरराष्ट्रीय क्रिकेट परिषदेने (ICC) ऐतिहासिक निर्णय घेतला आहे. आयसीसीने आगामी महिला विश्वचषकासाठी सर्व महिला अधिकाऱ्यांच्या पॅनेलची घोषणा केली आहे.
क्रिकेटच्या इतिहासातील ही एक ऐतिहासिक घटना असून, पहिल्यांदाच विश्वचषकासारख्या मोठ्या स्पर्धेत पंचांच्या भूमिकेत फक्त महिला दिसणार आहेत. एकूण चौदा महिला पंच आणि चार मॅच रेफरी असे अठरा महिला अधिकारी स्पर्धेतील एकूण एकतीस सामन्यांचे कामकाज पाहणार आहेत.
जय शाह म्हणाले, “हा क्रिकेटमधील एक महत्त्वाचा क्षण आहे”
आयसीसी चे अध्यक्ष जय शाह यांनी या निर्णयाला पाठिंबा देत म्हटले की, “हा महिला क्रिकेटच्या प्रवासातील एक महत्त्वाचा क्षण आहे. यामुळे खेळाच्या प्रत्येक क्षेत्रात अशा अनेक प्रेरणादायी कथांना वाव मिळेल अशी आम्हाला आशा आहे. सर्व महिला अधिकाऱ्यांचा पॅनेल हा केवळ एक मैलाचा दगड नाही, तर क्रिकेटमध्ये लैंगिक समानता आणण्यासाठी आयसीसीची असलेली कटिबद्धता दर्शवतो.”
ते पुढे म्हणाले की, “यामुळे महिला अधिकाऱ्यांची दृश्यमानता वाढेल आणि पुढील पिढ्यांसाठी आदर्श निर्माण होतील. जागतिक स्तरावर उत्कृष्ट कामगिरी करणाऱ्या महिलांना संधी देऊन आम्ही हे सिद्ध करत आहोत की, क्रिकेटमधील नेतृत्व कोणत्याही लिंगावर अवलंबून नाही.”
ऑस्ट्रेलियाच्या क्लेअर पोलोसॅक, जमैकाची जॅकलीन विलियम्स आणि इंग्लंडच्या सु रेडफर्न त्यांच्या तिसऱ्या महिला विश्वचषकात पंच म्हणून काम करणार आहेत. तर लॉरेन एजेनबॅग आणि किम कॉटन यांचा हा दुसरा विश्वचषक असेल.
30 सप्टेंबरपासून सुरू होणार स्पर्धा
एकूण 34 दिवस चालणाऱ्या या स्पर्धेची सुरुवात 30 सप्टेंबर रोजी गुवाहाटी येथील बरसापारा क्रिकेट स्टेडियमवर होणार आहे. या स्पर्धेतील पहिला सामना यजमान भारत आणि श्रीलंका यांच्यात खेळला जाईल.
हे देखील वाचा – चार्ली कर्क हत्या: एफबीआयकडून शूटरचा फोटो जारी; संशयिताचा शोध सुरू
