Mohit Sharma Retirement : भारताचा अनुभवी वेगवान गोलंदाज मोहित शर्माने आपल्या क्रिकेट कारकिर्दीला पूर्णविराम दिला आहे. 2015 च्या विश्वचषक स्पर्धेतील भारताच्या संघात समावेश असण्यापासून ते आयपीएलमध्ये वयाच्या तिशीनंतर शानदार पुनरागमन करण्यापर्यंतचा 14 वर्षांचा प्रवास त्याने संपवला.
37 वर्षीय मोहितने इन्स्टाग्रामवर एक भावनिक पोस्ट करत सर्व प्रकारच्या क्रिकेटमधून निवृत्त होत असल्याची माहिती दिली. आयपीएल 2026 साठी दिल्ली कॅपिटल्स संघाने त्याला रिलीज केल्यानंतर काही वेळातच त्याने हा निर्णय जाहीर केला.
आंतरराष्ट्रीय कारकीर्द आणि आयपीएल गाजवली
मोहित शर्माने 2013 मध्ये भारतीय संघात पदार्पण केले. त्याने देशासाठी 26 एकदिवसीय सामने (ODI) खेळले आणि त्यात 31 बळी मिळवले, तर 8 टी-20 आंतरराष्ट्रीय सामन्यांत 6 बळी घेतले. तो 2015 मध्ये ऑस्ट्रेलिया आणि न्यूझीलंड येथे झालेल्या विश्वचषकात भारतीय संघाचा महत्त्वाचा सदस्य होता. आंतरराष्ट्रीय स्तरावर छाप सोडण्यासोबतच त्याने हरियाणासाठी देशांतर्गत क्रिकेटमध्ये सातत्याने योगदान दिले.
आयपीएलने मोहितला क्रिकेट जगतात नवी ओळख दिली. 2012-13 मध्ये रणजी ट्रॉफीमध्ये उत्कृष्ट कामगिरी केल्यानंतर, त्याने चेन्नई सुपर किंग्स (CSK) संघात प्रवेश केला आणि महेंद्रसिंग धोनीचा तो मुख्य गोलंदाज बनला.
2013 च्या आयपीएलमध्ये त्याने 20 बळी घेतले, तर त्यानंतर लगेच 2014 च्या हंगामात 16 सामन्यांत 23 बळी घेऊन ‘पर्पल कॅप’ मिळवली. डेथ ओव्हर्समध्ये ( फलंदाजांना चकवणारे स्लो बॉल टाकण्याची त्याची कला याच पर्वातून पुढे आली.
आयपीएलमध्ये त्याने चेन्नई, पंजाब किंग्स, गुजरात टायटन्स आणि दिल्ली कॅपिटल्स या संघांचे प्रतिनिधित्व केले. त्याच्या आयपीएल कारकिर्दीचा शेवट 120 सामन्यांत 134 बळींसह झाला.
उत्कृष्ट पुनरागमन आणि निरोप
मोहितच्या कारकिर्दीतील सर्वात प्रभावी क्षण 2023 मध्ये आला. आयपीएलमध्ये संधी मिळवण्यासाठी झगडत असताना त्याने गुजरात टायटन्स संघात धमाकेदार पुनरागमन केले आणि त्या हंगामात 27 बळी घेऊन सर्वाधिक प्रभावी गोलंदाजांच्या यादीत स्थान मिळवले.
निवृत्तीच्या पोस्टमध्ये मोहितने आपल्या क्रिकेट प्रवासाला ‘आशीर्वाद’ (Blessing) असे संबोधले. त्याने हरियाणा क्रिकेट, भारतीय क्रिकेट नियामक मंडळ (BCCI), सर्व आयपीएल संघ आणि त्याच्यासोबत नेहमी उभ्या राहिलेल्या कुटुंबाचे आभार मानले.
हे देखील वाचा – IndiGo Flight Disruption : 200 हून अधिक इंडिगो उड्डाणे रद्द: प्रमुख विमानतळांवरील गोंधळाचे नेमके कारण काय?
