Rohan Bopanna Retirement : भारताला ग्रँडस्लॅम विजेतेपद मिळवून देणाऱ्या मोजक्या खेळाडूंमध्ये गणले जाणारे अनुभवी टेनिसपटू रोहन बोपण्णा यांनी अखेरीस प्रोफेशनल टेनिसमधून निवृत्तीची घोषणा केली आहे.
45 वर्षीय बोपण्णांनी 2 दशकांपेक्षा जास्त काळ चाललेल्या त्यांच्या एटीपी टूरवरील कारकिर्दीचा समारोप केला. या आठवड्यात पॅरिस मास्टर्समध्ये कझाकस्तानच्या अलेक्झांडर बुब्लिकसोबत खेळलेला सलामीचा सामना हा त्यांच्या टूरवरील शेवटचा सामना ठरला. यासोबतच त्यांच्या 22 वर्षांच्या कारकिर्दीचा शेवट झाला.
भावपूर्ण निरोपाचे पत्र:
बोपण्णांनी “एक निरोप… पण अंत नाही” या शीर्षकाखाली एक भावनिक निवेदन जारी केले आहे. त्यात त्यांनी ‘अधिकृतपणे रॅकेट खाली ठेवत’ असल्याचे सांगितले.
“आपल्या आयुष्याला अर्थ देणाऱ्या गोष्टीला निरोप कसा द्यायचा? टूरवरची 20 अविस्मरणीय वर्षे झाली, आता मात्र वेळ झाली आहे,” असे बोपण्णांनी लिहिले आहे.
“भारतातील कोडगु सारख्या छोट्या गावातून प्रवास सुरू केला. सर्व्हिस मजबूत करण्यासाठी लाकडी ओंडके फोडले, स्टॅमिना वाढवण्यासाठी कॉफीच्या मळ्यांमध्ये जॉगिंग केले आणि तुटलेल्या कोर्टावर स्वप्नांचा पाठलाग करत जगातील सर्वात मोठ्या एरिनामध्ये उभे राहिलो—हे सर्व अविश्वसनीय वाटते,” असे त्यांनी नमूद केले.
ग्रँडस्लॅम आणि सर्वात वयस्कर खेळाडूचा मान:
बोपण्णांनी त्यांच्या कारकिर्दीत अनेक मोठे विक्रम केले. 2017 मध्ये त्यांनी फ्रेंच ओपनमध्ये मिश्र दुहेरीचे विजेतेपद जिंकले. त्यानंतर 2024 मध्ये मॅथ्यू एब्डेनसोबत ऑस्ट्रेलियन ओपनमध्ये पुरुष दुहेरीचे पहिले विजेतेपद पटकावले.
2023 मध्ये त्यांनी एब्डेनसोबत इंडियन वेल्स ट्रॉफी जिंकून, 43 वर्षांच्या वयात सर्वात वयस्कर एटीपी मास्टर्स विजेता बनण्याचा मान मिळवला. तसेच, ऑस्ट्रेलियन ओपनच्या यशस्वी मोहिमेदरम्यान 43 व्या वर्षी दुहेरीमध्ये जागतिक क्रमवारीत नंबर 1 होणारे ते सर्वात वयस्कर खेळाडू ठरले.
कुटुंबाला समर्पित नोट:
बोपण्णांनी त्यांच्या यशाचे श्रेय कुटुंबाला दिले. त्यांनी त्याग केलेल्या आई-वडिलांचे, सतत प्रोत्साहन देणाऱ्या बहिणीचे आणि कोर्टाबाहेर सर्वात मोठी भागीदार असलेल्या पत्नीचे आभार मानले.
निवृत्तीनंतरही बोपण्णा खेळाशी जोडलेले राहण्याची शक्यता आहे.
हे देखील वाचा –
