Rohit Kohli Retirement: भारतीय क्रिकेट नियामक मंडळाचे (BCCI) उपाध्यक्ष राजीव शुक्ला यांनी स्टार क्रिकेटपटू विराट कोहली आणि रोहित शर्मा आगामी ऑस्ट्रेलिया दौऱ्यानंतर निवृत्त होणार असल्याच्या चर्चांना पूर्णपणे फेटाळले आहे. भारत 19 ऑक्टोबरपासून सुरू होणाऱ्या ऑस्ट्रेलिया दौऱ्यावर तीन सामन्यांची एकदिवसीय आणि पाच सामन्यांची टी-20 मालिका खेळणार आहे.
या मालिकेपूर्वीच रोहित आणि विराट यांची ही शेवटची एकदिवसीय मालिका असेल, अशी चर्चा रंगली आहे. मात्र, शुक्ला यांनी या निव्वळ अफवा असल्याचे स्पष्ट केले.
शुक्ला म्हणाले, ‘खेळाडूंच्या उपस्थितीने संघाला फायदा’
रोहित आणि विराट या दोघांनीही यापूर्वीच टी-20 आणि कसोटी क्रिकेटमधून निवृत्ती घेतली आहे आणि आता ते एकदिवसीय क्रिकेट खेळत आहेत.
राजीव शुक्ला यांनी या दोघांच्या निवृत्तीच्या बातम्या चुकीच्या असल्याचे सांगून त्यांचे खंडन केले. त्यांनी स्पष्ट केले की, या मालिकेदरम्यान या दोन्ही महान फलंदाजांची उपस्थिती संघासाठी फायद्याची ठरेल. खेळाडूंनी कधी निवृत्त व्हायचे, याचा निर्णय पूर्णपणे त्यांच्यावर अवलंबून असतो आणि ही त्यांची शेवटची मालिका असेल, असे बोलणे पूर्णपणे अयोग्य आहे.
शुक्ला म्हणाले, “रोहित आणि विराट एकदिवसीय संघात असणे आमच्यासाठी खूप महत्त्वाचे आहे, कारण ते दोघेही महान फलंदाज आहेत. मला वाटते की त्यांच्या उपस्थितीमुळे आम्ही ऑस्ट्रेलियाला नक्कीच हरवू. ही त्यांची शेवटची मालिका असेल, असे बोलणे चुकीचे आहे. निवृत्ती कधी घ्यायची, हे पूर्णपणे त्या खेळाडूंवर अवलंबून असते.”
शुभमन गिलकडे नेतृत्वाची धुरा
या दोन्ही खेळाडूंनी मे महिन्यात कसोटी क्रिकेटमधून निवृत्तीची घोषणा केल्यानंतर ऑस्ट्रेलिया दौरा हा आंतरराष्ट्रीय क्रिकेटमध्ये त्यांचे पुनरागमन असेल.
या मालिकेपूर्वी निवड समितीने युवा फलंदाज शुभमन गिलची एकदिवसीय संघाचा नवा कर्णधार म्हणून नियुक्ती केली आहे.
दरम्यान, पुढील एकदिवसीय विश्वचषक 2 वर्षांवर असल्याने निवड समितीने शुभमन गिलला या मोठ्या स्पर्धेसाठी तयार करण्यासाठी पुरेसा वेळ मिळावा म्हणून कर्णधारपदाची धुरा त्याच्याकडे सोपवण्याचा निर्णय घेतला आहे.
हे देखील वाचा – वादानंतर ‘मनाचे श्लोक’ सिनेमाचं नावं बदलले! मृण्मयी देशपांडेचा चित्रपट आता ‘या’ तारखेला होणार रिलीज
