India vs Namibia T20 World Cup: आयसीसी पुरुष टी-20 विश्वचषक 2026 मध्ये भारतीय संघाची विजयी घोडदौड सुरू आहे. अमेरिकेविरुद्ध झालेल्या चुरशीच्या सामन्यानंतर आता टीम इंडिया 12 फेब्रुवारी रोजी नामिबियाविरुद्ध मैदानात उतरणार आहे.
हा सामना दिल्लीतील अरुण जेटली स्टेडियमवर खेळवला जाणार आहे. अमेरिकेसारख्या दुबळ्या वाटणाऱ्या संघाने मागील सामन्यात भारताची दमछाक केल्यामुळे, भारतीय संघ नामिबियाला हलक्यात घेण्याची चूक करणार नाही.
घरच्या मैदानावर खेळताना भारतीय संघ या सामन्यात मोठा विजय मिळवून आपली उपांत्य फेरीतील दावेदारी अधिक भक्कम करण्याच्या उद्देशाने मैदानात उतरेल.
मागील सामन्यातील ‘सूर्य’प्रकाश
वानखेडे स्टेडियमवर झालेल्या मागील सामन्यात अमेरिकेच्या गोलंदाजांनी भारतीय फलंदाजीला खिंडार पाडले होते. एका क्षणी भारताची अवस्था 6 बाद 77 अशी झाली होती. मात्र, कर्णधार सूर्यकुमार यादवने संकटकाळात धावून येत 49 चेंडूत नाबाद 84 धावांची तुफानी खेळी केली. यात त्याने 10 चौकार आणि 4 षटकार लगावत भारताला 161 धावांपर्यंत पोहोचवले. त्यानंतर मोहम्मद सिराज (3/29), अर्शदीप सिंग (2/18) आणि अक्षर पटेल (2/24) यांच्या अचूक गोलंदाजीमुळे भारताने अमेरिकेला 132 धावांवर रोखत विजय मिळवला.
सामन्याचा तपशील: वेळ आणि ठिकाण
- तारीख: गुरुवार, 12 फेब्रुवारी 2026
- ठिकाण: अरुण जेटली स्टेडियम, दिल्ली
- वेळ: भारतीय प्रमाणवेळेनुसार संध्याकाळी 7:00 वाजता
दोन्ही संघ (Squads)
भारत: सूर्यकुमार यादव (कर्णधार), इशान किशन, अभिषेक शर्मा, टिळक वर्मा, रिंकू सिंग, हार्दिक पांड्या, शिवम दुबे, अक्षर पटेल, वरुण चक्रवर्ती, अर्शदीप सिंग, मोहम्मद सिराज, जसप्रीत बुमराह, कुलदीप यादव, संजू सॅमसन, वॉशिंग्टन सुंदर.
नामिबिया: गेरहार्ड इरास्मस (कर्णधार), झेन ग्रीन, बर्नार्ड शोल्ट्झ, रुबेन ट्रम्पेलमन, जेजे स्मित, जॅन फ्रायलिंक, लॉरेन स्टीनकॅम्प, मालन क्रुगर, निकोल लोफ्टी-ईटन, जॅक ब्रासेल, बेन शिकोंगो, जेसी बाल्ट, डायलन लेइचर, डब्ल्यूपी मायबर्ग, मॅक्स हिंगो.
थेट प्रक्षेपण कुठे पाहाल?
हा सामना टीव्हीवर ‘स्टार स्पोर्ट्स नेटवर्क’च्या विविध चॅनेलवर थेट पाहता येईल. तसेच मोबाईल किंवा लॅपटॉपवर ‘जिओ हॉटस्टार’ (Jio Hotstar) ॲप आणि वेबसाइटवर या सामन्याचा आनंद घेता येईल.
