Vaibhav Sooryavanshi Controversy : आयपीएल 2026 मध्ये आपल्या फलंदाजीने सर्वांचे लक्ष वेधून घेणारा 15 वर्षांचा युवा फलंदाज वैभव सूर्यवंशी सध्या एका वेगळ्याच वादामुळे चर्चेत आला आहे. भारत ए आणि अफगाणिस्तान ए यांच्यातील मालिकेदरम्यान त्याच्या फलंदाजीपेक्षा मैदानावरील एका वादाची जोरदार चर्चा रंगली आहे. श्रीलंका ए विरुद्धच्या सामन्यानंतर झालेल्या एका वादामध्ये वैभवने विरोधी खेळाडूला धक्का दिल्याचा प्रकार समोर आला होता.
या घटनेवर भारताचे माजी क्रिकेटपटू संजय मांजरेकर यांनी तीव्र शब्दांत नाराजी व्यक्त केली आहे. वैभवच्या या वागणुकीमुळे त्याला धडा शिकवण्यासाठी संघातून बाहेर काढायला हवे होते, असे थेट विधान मांजरेकर यांनी सोशल मीडियावर केले आहे.
नेमका काय घडला होता प्रकार?
त्रिकोणी मालिकेतील भारत ए आणि श्रीलंका ए यांच्यातील सामना अत्यंत अटीतटीचा झाला. दोन्ही संघांनी मुख्य सामन्यात 265 धावा केल्यामुळे सामना सुपर ओव्हरमध्ये पोहोचला:
- सुपर ओव्हरचा थरार: सुपर ओव्हरमध्ये भारताला विजयासाठी 17 धावांची गरज होती, मात्र भारतीय संघ केवळ 9 धावाच करू शकला. श्रीलंकेच्या कुगाथास मथुलनच्या शेवटच्या 3 चेंडूंवर वैभवला केवळ 6 धावा करता आल्या आणि भारताचा पराभव झाला.
- मैदानात झाली बाचाबाची: विजयानंतर श्रीलंकेचा खेळाडू विशन हलमबागे याने भारतीय फलंदाजांना उद्देशून काही वादग्रस्त आणि उकसवणाऱ्या टिप्पण्या केल्या. यामुळे संतापलेला वैभव सूर्यवंशी आणि त्याच्यात जोरदार वाद सुरू झाला.
- धक्का दिल्यामुळे वाढला वाद: वाद सुरू असतानाच हलमबागे वैभवच्या अगदी जवळ आला. परिस्थिती हाताबाहेर जात असल्याचे पाहून वैभवने त्याला मागे ढकलले. यानंतर ज्येष्ठ यष्टीरक्षक निरोशन डिकवेला याने मध्यस्थी करून हा वाद शांत केला.
संजय मांजरेकर यांनी एक्सवर काय म्हटले?
वैभव सूर्यवंशीच्या या आक्रमक पवित्र्यावर माजी खेळाडू संजय मांजरेकर यांनी थेट प्रशिक्षक आणि व्यवस्थापनावर बोट ठेवले आहे.
“मी जर भारत ए संघाचा प्रशिक्षक किंवा व्यवस्थापक असतो, तर अफगाणिस्तानविरुद्धच्या सामन्यात वैभव सूर्यवंशीला प्लेइंग इलेव्हनमधून नक्कीच बाहेर ठेवले असते. समोरून कितीही चिथावणी दिली गेली, तरीही मैदानात खेळाडूंशी शारीरिक वाद घालणे किंवा अंगावर जाणे योग्य नाही, हे त्याला समजणे गरजेचे आहे,” असे मांजरेकर यांनी लिहिले.
श्रीलंकन खेळाडूंवर झाली कारवाई; भारतीयांना काय मिळाली शिक्षा?
या लाजिरवाण्या प्रकारानंतर श्रीलंका क्रिकेट बोर्डाने नियुक्त केलेल्या मॅच रेफरींनी श्रीलंकेच्या खेळाडूंवर शिस्तभंगाची कारवाई केली आहे. वाद उकरून काढणाऱ्या विशन हलमबागेला दोषी ठरवण्यात आले आहे, तर वाद शांत करणाऱ्या निरोशन डिकवेलावर अतिउत्साही अपील केल्याप्रकरणी कारवाई करण्यात आली आहे.
दुसरीकडे, भारताचा कर्णधार तिलक वर्मा आणि वैभव सूर्यवंशी यांच्यावर अधिकृत कारवाई झाली की त्यांना केवळ समज देऊन सोडण्यात आले, याबाबत अद्याप स्पष्ट माहिती समोर आलेली नाही. कमी प्रकाशात सुपर ओव्हर खेळवण्यावरून तिलक वर्माचा पंचांशी मोठा वाद झाला होता.
सातत्य राखण्यात अपयशी ठरतोय वैभव
अफगाणिस्तानविरुद्धच्या सामन्यात बुधवारी वैभवने प्रियांश आर्यासोबत मिळून अवघ्या 8 षटकांत 75 धावांची कडक सलामी दिली. वैभवने 28 चेंडूंत 38 धावा करत काही अप्रतिम चौकार आणि २ षटकार ठोकले. मात्र, फरीदुन दाऊदझाईच्या एका बाउन्सरवर पूल मारण्याच्या नादात तो बाद झाला. या मालिकेत त्याने 14, 44, 21 आणि 38 अशा खेळी केल्या आहेत. तो चांगल्या सुरुवातीचे मोठ्या धावसंख्येत रूपांतर करण्यात अपयशी ठरत असल्याचे पाहायला मिळत आहे.
