Isuzu D-Max V-Cross : भारतातील लाइफस्टाइल पिक-अप सेगमेंटमध्ये आपली पकड मजबूत करण्यासाठी जपानी कार निर्माता कंपनी इसुझूने नवीन ‘डी-मॅक्स व्ही-क्रॉस’ (Isuzu D-Max V-Cross) भारतीय बाजारपेठेत उतरवली आहे.
या नवीन मॉडेलमध्ये कंपनीने केवळ डिझाइनमध्येच नव्हे, तर तांत्रिक बाबींमध्येही मोठे बदल केले आहेत. विशेष म्हणजे, कंपनीने आता या गाडीचे 4×2 व्हेरियंट कायमचे बंद केले असून, ग्राहकांना आता केवळ ‘फोर व्हील ड्राइव्ह’ (4×4) चाच पर्याय मिळणार आहे.
किंमत आणि स्पर्धा
नवीन इसुझू व्ही-क्रॉसची सुरुवातीची किंमत 25.50 लाख रुपये असून टॉप मॉडेलसाठी ती 30.28 लाख रुपयांपर्यंत (एक्स-शोरूम) जाते. ही गाडी भारतीय बाजारात थेट टोयोटा हायलिक्सला (Toyota Hilux) तगडी टक्कर देणार आहे.
डिझाइनमध्ये काय आहेत बदल?
गाडीचा मूळ आकार कायम ठेवला असला तरी समोरच्या बाजूला आता अधिक राकट आणि ‘बोल्ड’ ग्रिल देण्यात आली आहे. बंपरला नवीन लूक मिळाला असून पूर्वीची अतिरिक्त क्लॅडिंग कमी करून गाडीला अधिक सुटसुटीत बनवले आहे. बाजूच्या प्रोफाइलमध्ये नवीन 18 इंचाचे अलॉय व्हील्स पाहायला मिळतात, जे गाडीला अधिक प्रीमियम लूक देतात.
आधुनिक केबिन आणि फीचर्स
गाडीच्या आतील भागात मोठा बदल करण्यात आला आहे:
- मोठी टचस्क्रीन: जुन्या 9 इंचाच्या स्क्रीनऐवजी आता 10.3 इंचाची मोठी टचस्क्रीन देण्यात आली आहे. ही सिस्टीम वायरलेस अँड्रॉइड ऑटो आणि ॲपल कारप्लेला सपोर्ट करते.
- साऊंड सिस्टीम: टॉप व्हेरियंटमध्ये छतावर बसवलेले (रूफ माउंटेड) 8 स्पीकर देण्यात आले आहेत.
- प्रीमियम लूक: डॅशबोर्ड आणि दरवाजांवर नवीन ट्रिम्स वापरल्यामुळे केबिन आता अधिक आलिशान वाटते.
इंजिन आणि ऑफ-रोडिंग क्षमता
या पिक-अपमध्ये पूर्वीप्रमाणेच 1.9 लिटरचे डिझेल इंजिन दिले आहे, जे 161 बीएचपीची शक्ती आणि 360 न्यूटन मीटरचा टॉर्क जनरेट करते. ग्राहकांना 6 स्पीड मॅन्युअल आणि 6 स्पीड ऑटोमॅटिक गिअरबॉक्सचा पर्याय मिळेल.
सर्व व्हेरियंटमध्ये आता 4WD स्टैंडर्ड असल्याने आणि ‘ऑटो लॉकिंग डिफरेंशियल’च्या मदतीने ही गाडी कठीण रस्त्यांवर सहज धावू शकेल. सुरक्षेसाठी यात 360 डिग्री कॅमेरा आणि टायर प्रेशर मॉनिटरिंग सिस्टीम यांसारखे प्रगत फीचर्सही जोडले आहेत.
