Cholesterol Control Tips: आजच्या धकाधकीच्या जीवनात आणि बदलत्या आहार पद्धतीमुळे कोलेस्ट्रॉल वाढणे ही एक गंभीर समस्या बनली आहे. शरीरात दोन प्रकारचे कोलेस्ट्रॉल असतात: एक चांगले (HDL) आणि दुसरे वाईट (LDL). जेव्हा शरीरात वाईट कोलेस्ट्रॉलचे प्रमाण वाढते, तेव्हा नसांमध्ये अडथळे निर्माण होऊन हृदयविकाराचा धोका कैक पटीने वाढतो. तज्ज्ञांच्या मते, कोलेस्ट्रॉल वाढण्यामागे अनेक कारणे जबाबदार असतात.
कोलेस्ट्रॉल वाढण्याची प्रमुख कारणे
- चुकीचा आहार: जास्त तळलेले पदार्थ, फास्ट फूड, बेकरी आयटम, रेड मीट आणि ट्रान्स फॅट असलेल्या पदार्थांचे सेवन केल्याने शरीरातील वाईट कोलेस्ट्रॉल वेगाने वाढते.
- शारीरिक हालचालींचा अभाव: तासनतास एकाच ठिकाणी बसून काम करणे आणि व्यायामाचा अभाव यामुळे शरीरात चरबी साठू लागते, परिणामी कोलेस्ट्रॉलची पातळी असंतुलित होते.
- ताणतणाव आणि अपुरी झोप: सततचा मानसिक ताण, वेळेवर न झोपणे, धूम्रपान आणि मद्यपानाचे अतिसेवन यामुळे देखील ही समस्या उद्भवते.
- अनुवांशिकता: काही वेळा तुमची जीवनशैली चांगली असूनही केवळ कुटुंबामध्ये कोलेस्ट्रॉलचा इतिहास असल्याने ही समस्या उद्भवू शकते. अशा स्थितीत यकृताला वाईट कोलेस्ट्रॉल स्वच्छ करण्यात अडथळे येतात.
कोलेस्ट्रॉल कसे नियंत्रित ठेवावे?
कोलेस्ट्रॉलची पातळी नैसर्गिकरित्या नियंत्रणात ठेवण्यासाठी तज्ज्ञांनी खालील उपाय सुचवले आहेत:
- आहारात बदल: तूप, लोणी आणि फुल फॅट डेअरी उत्पादने मर्यादित प्रमाणात वापरा. त्याऐवजी ओट्स, बीन्स, हिरव्या पालेभाज्या आणि फळांसारख्या फायबरयुक्त अन्नाचा समावेश करा.
- हेल्दी फॅट्स: आहारात मासे, सुका मेवा (नट्स) आणि सोया उत्पादनांचा समावेश करणे फायदेशीर ठरते. स्वयंपाकासाठी नेहमी चांगल्या प्रतिच्या तेलाचा वापर करा.
- नियमित व्यायाम: दररोज किमान 30 मिनिटे वेगाने चालणे, योगासने किंवा कोणताही शारीरिक व्यायाम केल्याने चरबी जाळण्यास मदत होते.
- व्यसनांपासून दूर राहा: हृदय निरोगी ठेवण्यासाठी धूम्रपान आणि मद्यपानापासून लांब राहणे अत्यंत आवश्यक आहे.
- मानसिक आरोग्य: ताण कमी करण्यासाठी ध्यान (मेडिटेशन) आणि प्राणायाम करा. शरीराला दररोज पुरेशी झोप मिळेल याची काळजी घ्या.
वेळेवर केलेली तपासणी आणि जीवनशैलीत केलेले हे छोटे बदल तुम्हाला गंभीर आजारांपासून वाचवू शकतात.
