Used Vehicle Sale Rules : दिल्लीतील लाल किल्ल्याजवळकारमध्ये झालेल्या भीषण स्फोटामुळे देशात खळबळ उडाली आहे. या स्फोटात 13 लोकांचा दुर्दैवी मृत्यू झाला आहे. या गुन्हेगारी कृत्यात वापरण्यात आलेल्या कारच्या मालकीचे गुंतागुंतीचे जाळे आता तपासात समोर आले आहे.
या कारची अनेक वेळा खरेदी-विक्री झाली होती, पण कागदपत्रे पूर्ण झाली नव्हती. आता तपास यंत्रणा गाडीच्या नवीन मालकाचा शोध घेत आहेत.
हा प्रकार जुनी गाडी विकणाऱ्या प्रत्येक नागरिकासाठी धोक्याची घंटा आहे. तुम्ही गाडी विकली असली तरी, जर तुम्ही RTO मध्ये नावाचे हस्तांतरण पूर्ण केले नाही, तर गुन्हेगारी किंवा अपघाताच्या कोणत्याही प्रकरणात तुम्ही अडचणीत येऊ शकता.
गुंतवणूक विक्री करताना 5 महत्त्वाचे नियम पाळा
भविष्यातील कायदेशीर आणि आर्थिक त्रासापासून वाचण्यासाठी जुने वाहन विकताना खालील 5 गोष्टींची काळजी घेणे आवश्यक आहे:
विमा कंपनीला लगेच कळवा
कार विकल्यावर आपल्या विमा कंपनीला (Insurance Company) तातडीने याची माहिती द्या. यामुळे तुमच्या नावावर असलेली विमा पॉलिसी रद्द होईल आणि ‘नो क्लेम बोनस’ खरेदीदाराच्या नावावर हस्तांतरित होण्यास मदत होईल.
खरेदी-विक्रीचे कायदेशीर दस्तऐवज
केवळ तोंडी व्यवहार न करता, वाहन विक्रीचे कायदेशीर करार पूर्ण करा. फॉर्म 29 आणि फॉर्म 30 (Form 29 and Form 30) सह सर्व आवश्यक फॉर्म अचूक भरा आणि त्यावर खरेदीदाराची सही व सर्व तपशील नमूद केले आहेत याची खात्री करा.
खरेदीदाराचे ओळखपत्र अनिवार्य
गाडी विकताना खरेदीदाराची ओळख पूर्णपणे तपासा. त्यासाठी त्याचे आधार कार्ड, ड्रायव्हिंग लायसन्स किंवा पासपोर्ट यांसारखे सरकारी ओळखपत्र तपासा आणि त्याच्या पत्ता पुराव्याची प्रत आपल्याकडे ठेवा.
हस्तांतरणाच्या पावत्या जपा
वाहन आणि संबंधित कागदपत्रे खरेदीदाराला सोपवताना त्याच्याकडून डिलीव्हरी पावती (Delivery Receipt) वर सही करून घ्या. या पावतीवर गाडीची विक्रीची तारीख आणि वेळ नमूद करा, ज्यामुळे त्या वेळेनंतर गाडीच्या सर्व जबाबदाऱ्या खरेदीदाराच्या असतील, हे सिद्ध होईल.
RTO हस्तांतरण प्रक्रियेचा पाठपुरावा
गाडी विकल्यानंतरही सर्वात महत्त्वाची जबाबदारी म्हणजे नावाच्या हस्तांतरणाची प्रक्रिया पूर्ण झाली आहे की नाही, हे तपासणे. खरेदीदाराने आरटीओ (RTO) मध्ये ही प्रक्रिया सुरू केली आहे का, याचा पाठपुरावा करत राहा. जोपर्यंत नाव त्याच्या नावावर हस्तांतरित होत नाही, तोपर्यंत तुम्हीच कागदोपत्री मालक असता.
हे देखील वाचा – Krishi Vibhag New Logo : महाराष्ट्राच्या कृषी विभागात 38 वर्षांनंतर मोठा बदल; नव्या घोषवाक्याची केली घोषणा
