Sundar Pichai Salary : तंत्रज्ञान क्षेत्रातील दिग्गज कंपनी असलेल्या अल्फाबेटने (गुगलची मूळ कंपनी) सीईओ सुंदर पिचाई यांच्या मानधनात मोठी वाढ केली आहे. आगामी ३ वर्षांच्या कालावधीसाठी त्यांना तब्बल ६९२ दशलक्ष डॉलर्स ( जवळपास 6300 कोटी रुपये) इतका मोबदला मिळणार आहे. या वाढीमुळे सुंदर पिचाई जगातील सर्वाधिक मानधन मिळवणाऱ्या कॉर्पोरेट प्रमुखांच्या यादीत अग्रस्थानी पोहोचले आहेत.
मोबदल्याचे स्वरूप काय आहे?
पिचाई यांच्या या मोठ्या मानधनामध्ये विविध घटकांचा समावेश आहे:
१. परफॉर्मन्स स्टॉक युनिट्स: यात १२६ दशलक्ष डॉलर्स मूल्याचे शेअर्स दिले जातील. जर कंपनीने ठरवलेली कामगिरीची उद्दिष्टे ओलांडली, तर हे मूल्य २५२ दशलक्ष डॉलर्सपर्यंत पोहोचू शकते.
२. रिस्ट्रिक्टेड स्टॉक: तीन वर्षांच्या कालावधीत दरमहा मिळणारे ८४ दशलक्ष डॉलर्सचे शेअर्स.
३. वार्षिक पगार: दरवर्षी २ दशलक्ष डॉलर्सचा पगार.
४. स्वायत्त उपक्रम प्रोत्साहन: कंपनीने नवीन ३५० दशलक्ष डॉलर्सची स्टॉक इन्सेंटिव्ह योजना सुरू केली आहे, ज्यामध्ये पिचाई यांना वेमो आणि विंग एव्हिएशनच्या शेअर्सचा समावेश करून देण्यात आला आहे.
पिचाई यांच्या नेतृत्वावर कंपनीचा विश्वास
अल्फाबेटच्या संचालक मंडळाच्या मते, पिचाई यांनी ‘वेमो’ आणि ‘विंग’ सारख्या स्वायत्त वाहन आणि डिलिव्हरी उपक्रमांमध्ये केलेल्या उत्कृष्ट कामामुळे हा मोबदला वाढवण्यात आला आहे. ऑगस्ट २०१५ मध्ये सीईओ पदाची धुरा सांभाळल्यापासून सुंदर पिचाई यांनी गुगलचे मार्केट कॅप ५३५ अब्ज डॉलर्सवरून ३.६ ट्रिलियन डॉलर्सपर्यंत नेले आहे. जानेवारी महिन्यात हे मूल्य ४ ट्रिलियन डॉलर्सपर्यंत पोहोचले होते.
इतर तंत्रज्ञान प्रमुखांशी तुलना
सुंदर पिचाई यांचा हा मोबदला इतर दिग्गज कंपन्यांच्या प्रमुखांच्या तुलनेत कितीतरी मोठा आहे. उदाहरणार्थ, मायक्रोसॉफ्टचे सीईओ सत्या नाडेला यांना २०२५ या आर्थिक वर्षात ९६.५ दशलक्ष डॉलर्स, तर ॲपलचे टिम कूक यांना ७४.३ दशलक्ष डॉलर्स मानधन मिळाले होते.
५३ वर्षीय भारतीय वंशाचे सुंदर पिचाई २००४ मध्ये गुगलमध्ये रुजू झाले होते. क्रोम ब्राऊजर आणि अँड्रॉइड ऑपरेटिंग सिस्टिमच्या यशामध्ये त्यांनी मोलाची भूमिका बजावली होती. नुकत्याच समोर आलेल्या आकडेवारीनुसार, पिचाई आणि त्यांच्या पत्नीकडे सध्या ४९८ दशलक्ष डॉलर्स मूल्याचे १६.७ लाख शेअर्स आहेत.
