KitKat Chocolate Heist: युरोपमध्ये एका अत्यंत विचित्र आणि मोठ्या चोरीची घटना समोर आली आहे. तब्बल 4,13,793 किटकॅट चॉकलेट बार घेऊन जाणारा एक भलामोठा ट्रक प्रवासादरम्यान गायब झाला आहे.
इटलीहून पोलंडच्या दिशेने निघालेला हा ट्रक आपल्या नियोजित स्थळी पोहोचलाच नाही. या घटनेने केवळ चॉकलेट प्रेमींनाच धक्का दिला नाही, तर जागतिक स्तरावर या ‘स्वीट’ चोरीची चर्चा रंगली आहे.
नेमकी घटना काय?
स्विस कंपनी नेसलेने या चोरीच्या वृत्ताला दुजोरा दिला आहे. कंपनीने सांगितले की, त्यांच्या नवीन श्रेणीतील सुमारे 12 टन वजनाचे चॉकलेट घेऊन जाणारा ट्रक युरोपमधील वाहतुकीदरम्यान चोरीला गेला आहे. हा ट्रक इटलीच्या मध्यभागातून निघाला होता, मात्र तो नक्की कुठे गायब झाला, याचा पत्ता अद्याप लागलेला नाही. वाहन आणि त्यातील मालाचा कोणताही सुगावा लागलेला नसल्याने खळबळ उडाली आहे.
चॉकलेटचा काळा बाजार?
ईस्टरचा सण अवघ्या काही दिवसांवर असताना ही चोरी झाल्याने बाजारात चॉकलेटचा तुटवडा जाणवू शकतो, असा इशारा कंपनीने दिला आहे. चोरीला गेलेले हे चॉकलेट बार अनधिकृत मार्गाने बाजारात विकले जाण्याची शक्यता आहे. मात्र, प्रत्येक बारवर असलेल्या विशिष्ट बॅच कोडमुळे हे चॉकलेट शोधणे शक्य असल्याचे कंपनीने म्हटले आहे. स्थानिक प्रशासन आणि पुरवठा साखळी भागीदारांच्या मदतीने या प्रकरणाचा तपास सुरू आहे.
कंपनीची मिश्किल प्रतिक्रिया
या गंभीर घटनेवर किटकॅटने आपल्या प्रसिद्ध टॅगलाइनचा वापर करत अतिशय मजेशीर प्रतिक्रिया दिली आहे. कंपनीने म्हटले की, “आम्ही नेहमीच लोकांना किटकॅटसोबत छोटा ‘ब्रेक’ घेण्यास सांगतो, पण या चोरांनी आमचा संदेश खूपच गांभीर्याने घेतलेला दिसतोय. त्यांनी थेट 12 टन चॉकलेटसह ‘ब्रेक’ घेतला आहे. गुन्हेगारांच्या उत्कृष्ट चवीचे आम्ही कौतुक करतो, पण हा प्रकार गंभीर आहे.”
इंटरनेटवर मिम्सचा पाऊस
या चोरीची बातमी वाऱ्यासारखी पसरताच सोशल मीडियावर विनोदांना उधाण आले आहे. कोणीतरी विचारले की, “12 टन चॉकलेट काळ्या बाजारात विकणार तरी कसे?” तर एका युजरने गमतीने म्हटले की, “आता चॉकलेटचे तुकडे खंडणीसाठी पाठवले जातील की काय?”
विशेष म्हणजे, या घटनेचा फायदा घेत क्रिप्टो मार्केटमध्ये ‘किटकॅट’ नावाच्या मीम कॉईनच्या किमतीतही मोठी वाढ पाहायला मिळाली, ज्याचा नेसले कंपनीशी कोणताही संबंध नाही.
