Mahindra XUV 7XO: महिंद्रा अँड महिंद्राने भारतीय बाजारपेठेत आपली नवीन XUV 7XO अधिकृतपणे लाँच केली आहे. XUV 700 चा वारसा पुढे नेणारी ही नवीन एसयूव्ही तंत्रज्ञान, आरामदायी प्रवास आणि सुरक्षिततेच्या बाबतीत एक पाऊल पुढे आहे.
या गाडीची सुरुवातीची एक्स-शोरूम किंमत 13.66 लाख रुपये इतकी निश्चित करण्यात आली आहे. महाराष्ट्रातील चाकण येथील प्रकल्पात या गाडीची निर्मिती केली जाणार असून, यासाठी कंपनीने 415 कोटी रुपयांची गुंतवणूक केली आहे.
आकर्षक डिझाइन आणि प्रीमियम लूक
XUV 7XO चे बाह्य रूप अतिशय प्रीमियम आणि रांगडे आहे. समोरच्या बाजूला ‘पियानो ब्लॅक’ रंगाची मोठी ग्रिल आणि त्यावर हिऱ्यासारख्या चमकणाऱ्या खुणा देण्यात आल्या आहेत. यामध्ये बी-एलईडी प्रोजेक्टर हेडलॅम्प्स आणि नवीन डिझाइनचे एलईडी टेल-लॅम्प्स मिळतात. गाडीला अधिक रुबाबदार बनवण्यासाठी 19 इंचाचे डायमंड-कट अलॉय व्हील्स आणि इलेक्ट्रिक स्मार्ट डोअर हँडल्स देण्यात आले आहेत.
आलिशान इंटिरिअर आणि प्रगत तंत्रज्ञान
गाडीच्या आत प्रवेश करताच सर्वात आधी लक्ष वेधून घेतो तो म्हणजे डॅशबोर्डवरील 31.24 सेमीचा ट्रिपल-स्क्रीन लेआउट. भारतात प्रथमच पेट्रोल-डिझेल इंजिन असलेल्या एसयूव्हीमध्ये अशा प्रकारची स्क्रीन सर्व व्हेरिएंटमध्ये देण्यात आली आहे.
- आराम: लेदर सीट्स, व्हेंटिलेटेड फ्रंट आणि रिअर सीट्स, ड्युअल-झोन क्लायमेट कंट्रोल आणि पॅनोरॅमिक सनरूफमुळे प्रवासाचा आनंद द्विगुणित होतो.
- साऊंड: संगीताच्या चाहत्यांसाठी यात हरमन कार्डनची 16 स्पीकर्स असलेली साऊंड सिस्टम दिली आहे, जी डॉल्बी ॲटमॉसला सपोर्ट करते.
- स्मार्ट फीचर्स: यामध्ये ॲलेक्सा आणि चॅटजीपीटी (ChatGPT) इंटिग्रेशनसह 90 हून अधिक कनेक्टेड कार फीचर्स मिळतात.
इंजिन आणि परफॉर्मन्स
XUV 7XO मध्ये दोन इंजिन पर्याय उपलब्ध आहेत:
- 2.0 लीटर पेट्रोल इंजिन: 197 बीएचपी पॉवर आणि 380 एनएम टॉर्क.
- 2.2 लीटर डिझेल इंजिन: 185 बीएचपी पॉवर आणि 450 एनएम टॉर्क. या दोन्ही इंजिनसह 6-स्पीड मॅन्युअल आणि ऑटोमॅटिक गिअरबॉक्सचा पर्याय मिळतो. विशेष म्हणजे, या सेगमेंटमध्ये डिझेल व्हेरिएंटमध्ये ऑल-व्हील-ड्राइव्ह (AWD) देणारी ही एकमेव एसयूव्ही आहे. यामध्ये ‘दाविंची’ (DAVINCI) नावाची नवीन सस्पेंशन सिस्टम वापरली आहे, ज्यामुळे खराब रस्त्यांवरही प्रवास सुखकर होतो.
सुरक्षा आणि ड्रायव्हर असिस्टन्स
महिंद्राने या गाडीत सुरक्षेला सर्वोच्च प्राधान्य दिले असून यामध्ये 120 पेक्षा जास्त सेफ्टी फीचर्स आहेत.
- ADAS Level 2: यामध्ये ॲडॉप्टिव्ह क्रूझ कंट्रोल, लेन कीप असिस्ट आणि ऑटोमॅटिक इमर्जन्सी ब्रेकिंग यांसारखे 17 फीचर्स आहेत.
- इतर फीचर्स: 7 एअरबॅग्ज, 540-डिग्री कॅमेरा, टायर प्रेशर मॉनिटरिंग आणि ईएसपी यांसारख्या सुविधांमुळे ही गाडी भारत एनकॅप (Bharat NCAP) मध्ये 5-स्टार रेटिंग मिळवण्यासाठी सज्ज आहे.
बुकिंग आणि डिलिव्हरी
या एसयूव्हीचे बुकिंग 14 जानेवारी 2026 पासून सुरू होणार आहे. काही उच्च व्हेरिएंट्सची डिलिव्हरी त्याच दिवसापासून सुरू होईल, तर बेस व्हेरिएंट्सची डिलिव्हरी एप्रिल 2026 पासून नियोजित आहे.
हे देखील वाचा – Mohammed Shami : टीम इंडियाचा वेगवान गोलंदाज मोहम्मद शमीला निवडणूक आयोगाची नोटीस; ‘हे’ आहे कारण
