Prada Chai Perfume: काही महिन्यांपूर्वी मिलान फॅशन वीकदरम्यान भारताची प्रसिद्ध ‘कोल्हापुरी चप्पल’ आपल्या नावाने सादर केल्यामुळे आंतरराष्ट्रीय लक्झरी ब्रँड ‘प्राडा’वर भारतीयांनी जोरदार टीका केली होती. सुरुवातीला भारताचे नाव न दिल्यामुळे झालेल्या या वादानंतर, आता प्राडा कंपनीने भारतीयांना आणि विशेषतः चहाप्रेमींना आकर्षित करण्यासाठी एक अनोखी पावले उचलली आहेत.
प्राडाने आपल्या ‘लेस इन्फ्युजन्स’ कलेक्शनचा एक भाग म्हणून चहाच्या सुवासाचे एक नवीन परफ्युम बाजारात आणले आहे. ‘Infusion de Santal Chai’ असे या परफ्युमचे नाव असून, याची किंमत ऐकून अनेकांना धक्का बसला आहे. प्राडाच्या अधिकृत संकेतस्थळावर या 100 मिलीच्या परफ्युम बॉटलची किंमत 190 डॉलर्स म्हणजेच भारतीय चलनानुसार तब्बल 17,000 रुपये इतकी ठेवण्यात आली आहे.
मसाला चहा आणि चंदनाचा संगम; असे आहे परफ्युमचे स्वरूप
हे परफ्युम महिला आणि पुरुष दोघेही वापरू शकतात. यामध्ये भारतीय चहा आणि पाश्चात्त्य फॅशनचा मेळ घालण्याचा प्रयत्न करण्यात आला आहे:
- सुवासाचे घटक: यामध्ये सुवासिक मसाला चहाच्या नोट्ससोबतच क्रीमी चंदन, वेलची आणि ताज्या लिंबूवर्गीय फळांचा (सिट्रस) सुवास मिसळण्यात आला आहे.
- आकर्षक पॅकेजिंग: हे परफ्युम एका आलिशान तपकिरी रंगाच्या बाटलीत येते, ज्याला सफियानो टेक्स्चर असलेले कॅप देण्यात आले आहे. हा लूक अत्यंत राजेशाही वाटतो.
- दैनंदिन वापर: मस्कच्या सौम्य फिनिशिंगमुळे हे परफ्युम रोजच्या वापरासाठी उत्तम असल्याचा दावा कंपनीने केला आहे.
“मला चहा आवडतो, पण…” सोशल मीडियावर नेटिझन्सनी उडवली खिल्ली
प्राडा कंपनीने चहाप्रेमींना खूश करण्यासाठी हे अत्तर आणले असले, तरी सोशल मीडियावर मात्र यावर संमिश्र प्रतिक्रिया उमटत आहेत. काही जण या प्रयोगाचे कौतुक करत आहेत, तर अनेकांनी यावरून प्राडाला ट्रोल करण्यास सुरुवात केली आहे.
इंटरनेटवर नेटीझन्स “मला चहा प्यायला प्रचंड आवडतो, पण अंगाला चहाचा वास यावा असे मला अजिबात वाटत नाही” अशा कमेंट्स करत आहेत. तर काहींनी “हा कंपनीचा एखादा विनोद तर नाही ना?” असा प्रश्न विचारला आहे.
अनेक युजर्सनी जुन्या वादाची आठवण करून देत, “आधी कोल्हापुरी चपला चोरल्या आणि आता चहा” अशा उपरोधिक कमेंट्स देखील केल्या आहेत. हा परफ्युम लोकांना आवडला किंवा नाही, तरी भारतीय संस्कृती जागतिक लक्झरी फॅशन जगताला आकर्षित करत आहे हे यावरून स्पष्ट होते.
