12th Std Paper Leak : राज्य माध्यमिक व उच्च माध्यमिक शिक्षण मंडळाच्या वतीने घेण्यात येणाऱ्या बारावीच्या परीक्षेत पेपरफुटीचे एकामागून एक धक्कादायक प्रकार समोर येत असून, शिक्षण क्षेत्रात मोठी खळबळ उडाली आहे. १८ फेब्रुवारी रोजी पेपरफुटीप्रकरणी पोलिसांत गुन्हा दाखल झालेला असतानाही, नराधम आरोपींनी २१ फेब्रुवारी रोजी गणिताचा पेपर फोडल्याची अत्यंत गंभीर बाब उघडकीस आली आहे. राज्य शिक्षण मंडळाचे अध्यक्ष डॉ. शिवलिंग पटवे यांनी या वृत्ताला अधिकृत दुजोरा दिला असून, मंडळ सध्या पोलीस प्रशासनाशी सतत संपर्कात असल्याचे त्यांनी स्पष्ट केले आहे.
डिजिटल पुराव्यांतून पर्दाफाश-
तपासादरम्यान अटक करण्यात आलेल्या आरोपींनी पुरावे नष्ट करण्याच्या हेतूने आपले भ्रमणध्वनी (मोबाईल) ‘फॉर्मॅट’ केले होते. मात्र, पोलिसांनी तांत्रिक कौशल्याचा वापर करून हा विस्कळीत झालेला डेटा पुन्हा मिळवला (रिकव्हर केला). यातून असे निष्पन्न झाले की, १८ फेब्रुवारीला रसायनशास्त्र आणि भौतिकशास्त्राच्या पेपरफुटीचा प्रकार उघड होऊनही आरोपींचे धाडस कमी झाले नव्हते; त्यांनी २१ फेब्रुवारीला गणिताची प्रश्नपत्रिकाही अवैध मार्गाने प्रसारित केली होती. या संदर्भात पोलिसांच्या हाती भक्कम डिजिटल पुरावे लागले असून, पाच सदस्यीय विशेष तपास पथक (SIT) या रॅकेटच्या मुळापर्यंत पोहोचण्यासाठी कसून चौकशी करत आहे.
अटकेतील आरोपी आणि मुख्य सूत्रधाराचा शोध-
नागपूर विभागातील सेंट उर्सुला शाळेत एका विद्यार्थिनीच्या हालचालींवरून या प्रकरणाचा सुगावा लागला होता. ती विद्यार्थिनी वारंवार प्रसाधनगृहात जात असल्याने संशय बळावला आणि तिच्याकडे असलेल्या भ्रमणध्वनीची झडती घेतली असता, त्यात १६ फेब्रुवारीचे रसायनशास्त्र आणि १८ फेब्रुवारीचे भौतिकशास्त्राचे पेपर आढळून आले. या प्रकरणी आतापर्यंत शिक्षक निशिकांत मून, एक्सेलन्ट अकादमीचे मुस्तफा खान आणि जुनेद जावेद यांच्यासह चार जणांना बेड्या ठोकण्यात आल्या आहेत. मात्र, या संपूर्ण रॅकेटचा मुख्य सूत्रधार अद्याप फरार असून पोलीस त्याच्या मागावर आहेत.
कोचिंग क्लासेसचे संशयास्पद जाळे-
प्राथमिक तपासात मिळालेल्या माहितीनुसार, एका खाजगी कोचिंग संस्थेशी संबंधित व्यक्तीने आर्थिक फायद्यासाठी प्रश्नपत्रिका परीक्षेपूर्वीच व्हॉट्सअॅपच्या माध्यमातून प्रसारित केल्या होत्या. या व्हॉट्सअॅप ग्रुपवर केवळ प्रश्नपत्रिकाच नव्हे, तर त्यांची संभाव्य उत्तरे देखील पुरवण्यात आली होती. १० फेब्रुवारीपासून सुरू झालेल्या या परीक्षेत एकूण १३ लाखांहून अधिक विद्यार्थी सहभागी झाले आहेत. ३,३८७ परीक्षा केंद्रांवर अत्यंत कडक नियमावली असतानाही अशा प्रकारे पेपर फुटल्याने पालकांमध्ये आणि प्रामाणिक विद्यार्थ्यांमध्ये संतापाची लाट उसळली आहे. ११ मार्च रोजी परीक्षा संपणार असून, तोपर्यंत सुरक्षेच्या दृष्टीने कडक पावले उचलण्याचे आव्हान प्रशासनासमोर आहे.
