Baramati By Election 2026 : संपूर्ण राज्याचे राजकीय लक्ष वेधून घेणाऱ्या बारामती विधानसभा मतदारसंघाच्या पोटनिवडणुकीत आजचा दिवस अत्यंत निर्णायक ठरणार आहे. उमेदवारी अर्ज मागे घेण्याची आज अंतिम मुदत असून, राजकीय हालचालींना प्रचंड वेग आला आहे. उपमुख्यमंत्री अजित पवार यांच्या निधनामुळे रिक्त झालेल्या या जागेसाठी महायुतीकडून सुनेत्रा पवार रिंगणात आहेत, तर काँग्रेसनेही आपला उमेदवार उभा केल्याने निवडणूक बिनविरोध होण्याची शक्यता मावळली असल्याचे चित्र सध्या दिसत आहे.
राजकीय समीकरणे आणि माघारीचे सत्र-
बारामतीमध्ये एकूण ५३ उमेदवारांनी आपले नशीब अजमावण्यासाठी अर्ज दाखल केले होते. त्यापैकी कालपर्यंत करुणा मुंडे आणि अभिजित बिचुकले यांच्यासह ६ उमेदवारांनी आपले अर्ज मागे घेतले आहेत. सद्यस्थितीत ४७ उमेदवार निवडणुकीच्या मैदानात असून, आज दुपारी तीन वाजेपर्यंत किती उमेदवार माघार घेतात, यावर निवडणुकीचे अंतिम स्वरूप अवलंबून असेल. काँग्रेसने आपली उमेदवारी कायम ठेवल्यामुळे बारामतीत आता प्रत्यक्ष रणसंग्राम होण्याची चिन्हे गडद झाली आहेत.
सुनेत्रा पवार यांची काँग्रेसला साद, मात्र निर्णयाचा चेंडू दिल्लीच्या दरबारी-
महायुतीच्या उमेदवार सुनेत्रा पवार यांनी ही पोटनिवडणूक बिनविरोध व्हावी, यासाठी विशेष प्रयत्न सुरू केले आहेत. त्यांनी काँग्रेसचे प्रदेशाध्यक्ष हर्षवर्धन सपकाळ यांना पुन्हा एकदा दूरध्वनी करून उमेदवारी मागे घेण्याची विनंती केली. मात्र, काँग्रेस नेतृत्वाकडून मिळालेल्या माहितीनुसार, बारामतीची निवडणूक लढवण्याचा निर्णय पक्षाच्या केंद्रीय हायकमांडने घेतला आहे. त्यामुळे कोणताही अंतिम निर्णय घेण्यापूर्वी दिल्लीतील वरिष्ठ नेत्यांशी चर्चा करणे अनिवार्य असल्याचे काँग्रेसकडून स्पष्ट करण्यात आले आहे. या पार्श्वभूमीवर काँग्रेस आपली भूमिका मवाळ करणार की लढण्यावर ठाम राहणार, याची उत्सुकता शिगेला पोहोचली आहे.
आकाश मोरे आणि शरद पवार यांची नियोजित भेट-
या घडामोडींच्या केंद्रस्थानी असलेले काँग्रेसचे उमेदवार ॲड. आकाश मोरे आज शरद पवार यांची त्यांच्या ‘गोविंद बाग’ या निवासस्थानी भेट घेणार आहेत. आकाश मोरे हे माजी आमदार विजयराव मोरे यांचे सुपुत्र असून त्यांनी २०१४ मध्येही ही निवडणूक लढवली होती. आजच्या या भेटीत ते शरद पवार यांच्याकडे सक्रिय पाठिंब्याची मागणी करणार का, याकडे राजकीय विश्लेषकांचे लक्ष लागले आहे. या भेटीनंतर बारामतीच्या राजकारणाला कोणती नवीन दिशा मिळते, हे पाहणे औत्सुक्याचे ठरेल.
मतदानाचे वेळापत्रक
उपमुख्यमंत्री अजित पवार यांच्या दुःखद निधनामुळे रिक्त झालेल्या या जागेसाठी २३ एप्रिल २०२६ रोजी मतदान प्रक्रिया पार पडणार आहे. त्यानंतर ४ मे २०२६ रोजी या निवडणुकीचा निकाल जाहीर केला जाईल. बारामतीचा गड राखण्यात सुनेत्रा पवार यशस्वी होतात की काँग्रेसचे आकाश मोरे धक्कादायक निकाल देतात, याचा फैसला येत्या काळात होणार आहे.
