Bhiwandi Mayor Election : भिवंडी-निजामपूर शहर महानगरपालिकेच्या महापौरपदासाठी आज अत्यंत चुरशीच्या वातावरणात निवडणूक पार पडत आहे. या निवडणुकीच्या रणधुमाळीत भारतीय जनता पक्षामध्ये दोन गट पडल्याने काँग्रेससाठी सत्तेचा मार्ग सुकर होईल, अशी चिन्हे दिसत असतानाच, काँग्रेस अंतर्गत प्रचंड मोठा वाद उफाळून आला आहे. काँग्रेसचे भिवंडी शहराध्यक्ष रशीद ताहीर मोमीन यांनी स्वपक्षाचे प्रदेशाध्यक्ष हर्षवर्धन सकपाळ यांच्यावर अत्यंत गंभीर आणि खळबळजनक आरोप केले असून, यासंदर्भात थेट काँग्रेस नेते राहुल गांधी यांच्याकडे लेखी तक्रार धाडली आहे.
प्रदेशाध्यक्षांवरील आरोपांमुळे राजकीय वर्तुळात खळबळ-
शहराध्यक्ष रशीद ताहीर मोमीन यांनी आपल्या तक्रारीत म्हटले आहे की, प्रदेशाध्यक्ष हर्षवर्धन सकपाळ यांनी समाजवादी पक्षाचे आमदार रईस शेख यांना हाताशी धरून काँग्रेस पक्षाचे हित धोक्यात आणले आहे. निवडणुकीपूर्वी ‘एबी’ फॉर्मचे वाटप असो वा आताच्या राजकीय वाटाघाटी, यामध्ये स्थानिक नेतृत्वाला डावलून पक्षाची सूत्रे समाजवादी पक्षाच्या नेत्यांच्या हाती सोपवण्यात आली आहेत. “प्रदेशाध्यक्षांनी काँग्रेस पक्ष भारतीय जनता पक्षाला विकला आहे,” असा थेट आणि सनसनाटी आरोप मोमीन यांनी केला आहे. या अंतर्गत कलहामुळे काँग्रेस कार्यकर्त्यांमध्ये कमालीची नाराजी पसरली असून, हक्काची सत्ता हातातून जाण्याची भीती व्यक्त होत आहे.
संख्याबळाचे गणित आणि वाटाघाटींचा पेच:
९० सदस्य संख्या असलेल्या भिवंडी महानगरपालिकेत बहुमतासाठी ४६ मतांची आवश्यकता आहे. सध्या काँग्रेसचे ३० आणि राष्ट्रवादी काँग्रेस (शरदचंद्र पवार पक्ष) यांचे १२ असे एकूण ४२ सदस्यांचे बलाबल महाविकास आघाडीकडे आहे. विजयासाठी केवळ चार अतिरिक्त मतांची गरज असतानाही, प्रदेशाध्यक्षांनी वाटाघाटी संदर्भात स्थानिक शहराध्यक्षांना कोणत्याही सूचना दिल्या नसल्याचा दावा मोमीन यांनी केला आहे. उलट, भाजपमधील फुटीचा फायदा घेण्याऐवजी पक्षांतर्गत गटबाजीला खतपाणी घातले जात असल्याचे त्यांचे म्हणणे आहे.
भाजपमधील फूट आणि अपात्रतेची टांगती तलवार-
दुसरीकडे, भारतीय जनता पक्षामध्ये देखील दोन गट पडल्याचे चित्र स्पष्ट झाले आहे. या फुटीचा लाभ काँग्रेसला मिळण्याची शक्यता वर्तवण्यात येत असली, तरी भाजपने अत्यंत आक्रमक पवित्रा घेतला आहे. आपल्या पक्षातून फुटलेल्या नगरसेवकांना अपात्र ठरवण्यासाठी भाजपने कायदेशीर हालचाली गतिमान केल्या आहेत. यामुळे फुटलेल्या गटात भीतीचे वातावरण असून, मतदानाच्या वेळी ते कोणाच्या बाजूने उभे राहतात, यावर महापौरपदाचे भवितव्य अवलंबून असणार आहे.
आजच्या निवडीकडे राज्याचे लक्ष-
आज होणाऱ्या या निवडणुकीत एकीकडे भाजपमधील बंडाळी आणि दुसरीकडे काँग्रेसमधील प्रदेशाध्यक्ष विरुद्ध शहराध्यक्ष असा टोकाचा संघर्ष पाहायला मिळत आहे. राहुल गांधी या तक्रारीची काय दखल घेतात आणि भिवंडीच्या महापौरपदी कोणाची वर्णी लागते, याकडे सर्वांचे लक्ष लागले आहे. सत्तास्थापनेच्या या खेळात अनपेक्षित निकालाची शक्यता नाकारता येत नाही.
