Bigg Boss Marathi : लोकप्रियतेचे सर्व विक्रम मोडीत काढणारा छोटा पडद्यावरील ‘बिग बॉस मराठी’चा सहावा सीजन आता आपल्या अंतिम टप्प्यावर येऊन पोहोचला आहे. घरातील वादविवाद, मैत्री, प्रेम आणि चुरशीचे टास्क यामुळे या पर्वाने प्रेक्षकांना अक्षरशः खिळवून ठेवले आहे. आता ग्रँड फिनालेचे काऊंटडाऊन सुरू झाले असून येत्या १९ एप्रिल २०२६ रोजी या पर्वाचा महाअंतिम सोहळा रंगणार आहे. सध्या घरामध्ये सात तगडे स्पर्धक उरले असून, त्यांच्यात विजेतेपदाची ट्रॉफी पटकावण्यासाठी अटीतटीची लढत पाहायला मिळत आहे.
तन्वी कोलतेची बाजी; मिळवले ‘तिकीट टू फिनाले’
अंतिम फेरीच्या शर्यतीत सर्वात मोठे यश तन्वी कोलते हिने संपादन केले आहे. अत्यंत अटीतटीच्या झालेल्या ‘तिकीट टू फिनाले’ टास्कमध्ये तन्वीने राकेश बापट आणि अनुश्री मानेला धूळ चारत थेट अंतिम फेरीत आपले स्थान निश्चित केले आहे. या विजयामुळे तन्वीला केवळ फिनालेचे तिकीटच मिळाले नाही, तर या आठवड्यातील नामांकनातून (Nomination) तिने विशेष संरक्षण (Immunity) देखील प्राप्त केले आहे. तन्वी पाठोपाठ घरातील विद्यमान कॅप्टन रेवा कौरसे देखील आपल्या पदामुळे सुरक्षित असून, इतर पाच स्पर्धकांवर मात्र घराबाहेर पडण्याची टांगती तलवार आहे.
एलिमिनेशनचा ससेमिरा: कोण होणार बाहेर?
या आठवड्यात घराबाहेर पडण्यासाठी राकेश बापट, विशाल कोटियन, अनुश्री माने, दिपाली सय्यद आणि राखी सावंत हे पाच स्पर्धक नामांकित झाले आहेत. विविध रिपोर्ट्स आणि सोशल मीडियावरील कलानुसार, राकेश बापट आणि अनुश्री माने यांना प्रेक्षकांचा मोठा पाठिंबा मिळत असून ते सुरक्षित होण्याची दाट शक्यता आहे. दिपाली सय्यद देखील सुरक्षित परिघात असल्याचे समजते. मात्र, चिंतेची बाब म्हणजे विशाल कोटियन आणि राखी सावंत या दोन अनुभवी खेळाडूंना प्रेक्षकांकडून सर्वात कमी मते मिळण्याची शक्यता वर्तवण्यात येत आहे. त्यामुळे या आठवड्याच्या ‘भाऊच्या धक्क्या’वर या दोघांपैकी एकाचा प्रवास संपण्याची चिन्हे आहेत.
विशाल कोटियनवर नियमावलीची कडक कारवाई-
घरातील वादाचे पडसाद देखील या एलिमिनेशनवर उमटताना दिसत आहेत. काही दिवसांपूर्वी विशाल कोटियन आणि राकेश बापट यांच्यात झालेल्या जोरदार वादानंतर बिग बॉसने कठोर पावले उचलली होती. या राड्यामुळे राकेश बापटला एका आठवड्यासाठी, तर विशाल कोटियनला थेट संपूर्ण हंगामासाठी नामांकित करण्याची शिक्षा सुनावण्यात आली होती. विशालच्या या आक्रमक पवित्र्यामुळे प्रेक्षकांची नाराजी त्याला महागात पडू शकते, अशी चर्चा आता रंगली आहे.
उत्कंठा आणि जल्लोष: बिग बॉसचा वाढदिवस-
एलिमिनेशनची धाकधूक मनात असतानाच स्पर्धकांसाठी एक आनंदाची बातमी देखील आहे. या आठवड्यात बिग बॉसचा वाढदिवस साजरा केला जाणार असून, घरातील सर्व सात स्पर्धक एकत्र येऊन हा विशेष सोहळा साजरा करतील. या निमित्ताने स्पर्धकांमधील तणाव काही काळ निवळलेला पाहायला मिळेल.
