BMC Election : देशातील सर्वात श्रीमंत आणि प्रभावशाली महापालिका म्हणून ओळखली जाणारी मुंबई महानगरपालिकेची निवडणूक आता जवळ येऊन पोहोचली आहे. येत्या १५ जानेवारी २०२५ रोजी होणाऱ्या या मतदानाच्या पार्श्वभूमीवर राजकीय समीकरणे झपाट्याने बदलू लागली आहेत.
महाविकास आघाडीतील जागावाटपाचा गोंधळ सोडवण्यासाठी मातोश्री येथे शिवसेना पक्षप्रमुख उद्धव ठाकरे यांच्यासह राष्ट्रवादी काँग्रेसच्या शरद पवार गटाचे प्रदेशाध्यक्ष जयंत पाटील यांची महत्वाची बैठक पार पडली. या बैठकीत मुंबईतील जागावाटपाचा फॉर्म्युला ठरवण्यासाठी तात्त्विक चर्चा झाली. अधिकच्या माहितीनुसार, ठाकरे बंधूंनी राष्ट्रवादीला केवळ १६ जागांचा प्रस्ताव देण्याची तयारी दर्शवली आहे. ही बैठक मुंबईतील राजकीय संघर्ष आणि महापालिकेतील समीकरणांच्या आगामी बदलांचे महत्त्वाचे संकेत देते.
निवडणुकीतील जागांसंदर्भातील मागणीचे मुख्य कारण राष्ट्रवादी काँग्रेसच्या मागील कामगिरीवर आधारित आहे. मुंबई महापालिकेतील एकूण २२७ जागांपैकी राष्ट्रवादीने किमान २५ जागा मिळाव्यात, अशी मागणी त्यांनी उद्धव ठाकरे यांच्याकडे मांडली आहे.
राष्ट्रवादी काँग्रेसने ही मागणी २०१७ च्या निवडणुकीत मिळालेल्या यशाचा आधार घेऊन केली आहे. त्या वेळी पक्षाचे ९ नगरसेवक निवडून आले होते. या हक्काच्या जागांसह, पक्षविस्तारासाठी अतिरिक्त जागांची मागणी देखील करण्यात आली आहे.
विशेषतः ज्या प्रभागांमध्ये राष्ट्रवादीचा पारंपरिक जनाधार मजबूत आहे आणि जिथे स्थानिक उमेदवारांचा प्रभाव आहे, अशा ठिकाणच्या जागा राखून देण्याची विनंती त्यांनी केली आहे.
उद्धव ठाकरे यांनी राष्ट्रवादी काँग्रेसला त्यांच्या पक्षाच्या कोट्यातील काही जागा देण्याची तयारी दर्शविली असली, तरी जागांचा आकडा १६ वर मर्यादित ठेवण्याचा त्यांचा निर्धार स्पष्ट दिसतो. यामुळे मित्रपक्षांसोबतच्या जागावाटपात ठाकरेंना योग्य संतुलन राखण्यासाठी कठीण जात असल्याचे दिसून येत आहे.
तसेच, नुकताच शिवसेना ठाकरे गट आणि मनसे यांच्यात युतीचा फॉर्म्युला जवळपास निश्चित झाल्याचे संकेत मिळाले आहेत. मुंबईत शिवसेनेचे वर्चस्व कायम राहावे यासाठी ठाकरे बंधूंनी राष्ट्रवादीसाठी १६ जागांचा प्रस्ताव ठेवल्याचे समजते, जे पक्षीय गणित आणि स्थानिक राजकीय समीकरणांचा विचार करून आखण्यात आले आहे.
राष्ट्रवादी काँग्रेसला सध्या १६ जागांचा प्रस्ताव समाधानकारक वाटत नसल्यामुळे येत्या काळात या मुद्यावर पुन्हा काही फेऱ्यांमध्ये चर्चा होण्याची शक्यता वर्तवली जात आहे. जर राष्ट्रवादीला अपेक्षित २५ जागा मिळाल्या नाहीत, तर महाविकास आघाडीच्या मुंबईतील ऐक्यावर याचा कसा परिणाम होईल, या प्रश्नाकडे सध्या राजकीय वर्तुळाचे विशेष लक्ष केंद्रित झाले आहे.
हे देखील वाचा – BJP National President : भाजपच्या नेतृत्वातील तरुण क्रांतीची धमाकेदार सुरुवात; नबीनच्या नेतृत्वाखाली भाजपमध्ये नवे युग सुरु होणार?
