BMC Mayor 2026 : मुंबई महापालिका निवडणुकांचा निकाल जाहीर होऊन पंधरा दिवसांहून अधिक काळ लोटला. मात्र, अद्यापही महापौर आणि उपमहापौरांची नावे जाहीर झाली नव्हती. अखेर ही नावे जाहीर झाली आहेत. शिवसेना आणि भाजपाची आज संयुक्त बैठक होऊन महापौर आणि उपमहापौर पदासाठी उमेदवार अंतिम करण्यात आले. भाजपाचे मुंबई अध्यक्ष अमित साटम यांनी महापौर पदासाठी आणि शिवसेनेचे नेते राहुल शेवाळे यांनी उपमहापौर पदासाठी उमेदवार जाहीर केले. त्यानुसार, भाजपाच्या रितू तावडे यांचं नाव मुंबईच्या महापौर पदासाठी अंतिम करण्यात आलं असून उपमहापौर पदासाठी संजय घाडी यांचं नाव अंतिम करण्यात आलं आहे. या दोघांनीही उमेदवारी अर्ज भरले आहेत.
मुंबई महापालिकेत शिवसेना आणि भाजपा यांनी संयुक्त निवडणूक लढवली होती. या निवडणुकीत शिवसेना-भाजपाच्या युतीला बहुमत मिळाले. त्यामुळे त्यांनी महापौर पदासाठी दावा केला. मात्र, महापौर पदावरून दोन्ही पक्षांत मतभेद झाल्याचं पाहायला मिळालं. मात्र, आता अंतिम निर्णय घेण्यात आला असून भाजपाला महापौर पद मिळालं असून शिवसेनेला उपमहापौरपद मिळालं आहे. त्यानुसार, भाजपाच्या रितू तावडे यांना महापौर पदासाठी आणि शिवसेनेसेचे संजय घाडी यांना उपमहापौर पदसाठी उमेदवारी देण्यात आली आहे.
११ फेब्रुवारी रोजी होणार महापौर पदासाठी निवडणूक-
महापौर आणि उपमहापौर पदासाठी नामनिर्देशन अर्ज भरण्याची अंतिम मुदत ७ फेब्रुवारी म्हणजेच आज संपणार आहे. त्याआधीच शिवसेना भाजपाने आपले उमेदवार जाहीर केले. महायुतीकडून महापौर आणि उपमहापौर पदासाठी अर्ज दाखल केले गेले आहेत. येत्या ११ फेब्रुवारी रोजी दुपारी १२ वाजता महापौर पदासाठी निवडणूक होणार आहे. दरम्यान, शिवसेना (ठाकरे) पक्षाकडून अद्याप अधिकृत उमेदवार जाहीर झालेले नसल्याने बिनविरोध निवडणुकीची चर्चा पालिकेत सुरू झाली आहे. राष्ट्रवादीचे (शरद पवार) एकमेव नगरसेवकानेही शुक्रवारी महायुतीला पाठिंबा दिला. आज दुपारी १२ च्या सुमारास मातोश्रीवर ठाकरेंच्या वरिष्ठ नेत्यांमध्ये बैठक आयोजित करण्यात आली आहे. त्या बैठकीतील चर्चेनंतर विरोधी पक्ष महापौर पदासाठी उमेदवार देणार की नाही, यावर बिनविरोध निवडणूक ठरेल.
यंदा महिला आरक्षण-
यंदा महापौर पद हे सर्वसाधारण (महिला) वर्गासाठी राखीव असल्याची सोडत निघाली होती. महापौर पदासाठी कोणत्याही प्रवर्गातून निवडून आलेल्या नगरसेविकेला उमेदवारी देता येणार असल्याची ही सोडत होती. भाजपाला स्पष्ट बहुमत असल्याने भाजपाकडे सर्वाधिक ४९ नगरसेविका आहेत. त्यामुळे नगरसेविकांमधील चुरस वाढली होती. यावेळी तीन महिला नगरसेविकांची नावे चर्चेत होती. यापैकी रितू तावडे यांचं नाव अंतिम करण्यात आलं असून त्यांना उमेदवारी जाहीर झाली आहे.
मुंबई महानगरपालिकेच्या महापौरपदी भारतीय जनता पक्षाच्या ज्येष्ठ नगरसेविका रितू तावडे यांची वर्णी लागणार आहे, तर शिवसेनेच्या वाट्याला आलेल्या उपमहापौर पदासाठी उमेदवार म्हणून संजय घाडी यांच्या नावावर शिक्कामोर्तब करण्यात आला आहे. हे दोन्ही नेते आपापल्या पक्षातील अनुभवी आणि जनमानसात पकड असलेले लोकप्रतिनिधी मानले जातात.
कोण आहेत रितू तावडे?
भारतीय जनता पक्षाचा ईशान्य मुंबईतील एक अभ्यासू आणि आक्रमक चेहरा म्हणून रितू तावडे यांची ओळख आहे. प्रभाग क्रमांक १३२ मधून त्या भाजपच्या नगरसेविका म्हणून निवडून आल्या असून, महापालिकेत ही त्यांची दुसरी टर्म आहे. घाटकोपर सारख्या गुजराती बहुल क्षेत्रात भाजपचा एक आश्वासक ‘मराठी चेहरा’ म्हणून त्या लोकप्रिय आहेत. यापूर्वी त्यांनी महानगरपालिकेच्या अत्यंत महत्त्वाच्या अशा शिक्षण समितीचे अध्यक्षपद भूषवले आहे. तसेच स्थापत्य समितीच्या उपाध्यक्ष म्हणूनही त्यांनी कार्यभार सांभाळला आहे. वीज दरवाढ यांसारख्या जनसामान्यांच्या प्रश्नांवर त्यांनी रस्त्यावर उतरून तीव्र आंदोलने केली आहेत.
कोण आहेत संजय घाडी? (नवे उपमहापौर, मुंबई)
शिवसेनेकडून उपमहापौर पदासाठी निवड झालेले संजय घाडी हे पक्षसंघटनेतील जुने आणि निष्ठावान कार्यकर्ते आहेत. प्रभाग क्रमांक ५ चे प्रतिनिधित्व करणारे घाडी हे शिवसेनेचे उपनेते असून त्यांच्याकडे रायगड जिल्ह्याच्या संपर्कप्रमुखपदाची धुरा आहे. १९८८-८९ च्या काळात त्यांनी भारतीय विद्यार्थी सेनेचे विभागप्रमुख म्हणून काम केले आहे. तसेच १९९०-९१ मध्ये ते मुंबई विद्यापीठाच्या स्टुडंट कौन्सिलचे अध्यक्ष आणि सिनेट सदस्य राहिले आहेत. २०१७ ते २०२२ या काळात नगरसेवक म्हणून काम केल्यानंतर, २०२६ च्या निवडणुकीत ते पुन्हा एकदा मोठ्या मताधिक्याने विजयी झाले आहेत.
“मुंबईची प्रथम नागरिक नव्हे, तर सेवक म्हणून काम करेन” – रितू तावडे
“मुंबईच्या महापौरपदी माझी निवड होणे हा माझ्यासाठी सन्मान असला, तरी मी स्वतःला या शहराची ‘प्रथम नागरिक’ न समजता ‘प्रथम सेवक’ मानून काम करणार आहे. महापौरपदाबाबत संपूर्ण मुंबईत मोठी उत्सुकता होती. आता आपण सर्वजण मुंबईच्या हितासाठी निवडून आलो आहोत. त्यामुळे सभागृहाची प्रतिष्ठा राखून, पक्षभेद विसरून आणि अत्यंत प्रामाणिकपणे शहराच्या विकासासाठी काम करण्याची माझी मनीषा आहे.” असेही त्या म्हणाल्या.
मुंबई महानगरपालिकेच्या निवडणुकीत सर्वाधिक जागा जिंकून भाजपने आपले वर्चस्व निर्विवादपणे सिद्ध केले आहे. तथापि, ही निवडणूक केवळ आकड्यांची नसून ती राजकीय प्रतिष्ठेची आणि अस्मितेची लढाई होती.
१. रितू तावडे: अनुभवावर आधारित निवड
महापौरपदासाठी रितू तावडे यांच्या नावाची केलेली शिफारस ही भाजपच्या विचारपूर्वक आखलेल्या रणनीतीचा एक भाग आहे. केवळ राजकीय सोय म्हणून नव्हे, तर महापालिकेच्या कामकाजाचा दांडगा अनुभव असलेला चेहरा समोर आणून, प्रशासनावर पकड निर्माण करण्याचा पक्षाचा मानस आहे. दोन वेळा नगरसेविका म्हणून राहिलेल्या आणि शिक्षण समितीचे अध्यक्षपद भूषवलेल्या तावडे यांच्या अनुभवाचा फायदा मुंबईच्या विकासकामांना गती देण्यासाठी होईल, असा विश्वास पक्षनेतृत्वाने व्यक्त केला आहे.
२. ‘बिनविरोध’ निवडीसाठी मुत्सद्देगिरी
भाजपने केवळ सत्तेवर दावा ठोकून न थांबता, ही निवड बिनविरोध पार पाडण्यासाठी प्रयत्न सुरू केले आहेत. लोकशाही प्रक्रियेत बहुमताला महत्त्व असले, तरी सर्वसंमतीने झालेली निवड ही अधिक नैतिक बळ देणारी ठरते. यासाठी भाजपच्या ज्येष्ठ नेत्यांनी इतर राजकीय पक्षांशी आणि अपक्ष नगरसेवकांशी संवाद साधण्यास सुरुवात केली आहे. या मुत्सद्देगिरीमागील मुख्य उद्देश असा आहे की, देशातील या महत्त्वाच्या महानगराचा कारभार सुरू होताना कोणताही संघर्ष न होता तो एकमताने व्हावा.
३. प्रशासकीय समन्वय आणि सर्वसमावेशक कारभार
महानगरपालिकेत केवळ सत्तेवर बसणे हे भाजपचे उद्दिष्ट नसून, ‘एकमत आणि समन्वय’ या सूत्रावर आधारित कारभार चालवण्यासाठी पक्ष आग्रही आहे. विरोधी पक्षांना विश्वासात घेऊन काम केल्यास मुंबईच्या प्रलंबित प्रकल्पांना लवकर मार्गी लावता येईल, अशी भाजपची धारणा आहे. यामुळेच, केवळ आपल्या संख्याबळाचा वापर न करता, सर्वांना सोबत घेऊन जाण्याचे धोरण पक्षाने स्वीकारले आहे. हे धोरण आगामी काळात महापालिकेच्या कामकाजात किती सकारात्मक बदल घडवून आणते, हे पाहणे महत्त्वाचे ठरेल.
४. राजकीय संदेश आणि भविष्यातील दिशा
या रणनीतीतून भाजपने केवळ मुंबईच नव्हे, तर संपूर्ण राज्याला एक संदेश दिला आहे की, ते केवळ सत्तेसाठी आग्रही नसून, प्रशासकीय सुशासनासाठी (Good Governance) कटिबद्ध आहेत. रितू तावडे यांच्यासारख्या अनुभवी नेतृत्वाच्या माध्यमातून मुंबईच्या विकासाचा एक नवा अध्याय सुरू करण्याचा भाजपचा हा प्रयत्न यशस्वी होताना दिसत आहे.
BMC: महापालिकेतील पक्षीय बलाबल (२०२६ निवडणूक निकाल)
मुंबईकरांनी महायुतीला स्पष्ट बहुमत मिळाले आहे. सत्तेसाठी आवश्यक असलेली ११८ (मॅजिक फिगर ११४) ही संख्या महायुतीकडे आहे.
भाजप – ८९
शिवसेना ठाकरे गट – ६५
शिवसेना – २९
काँग्रेस – २४
मनसे – ०६
एमआयएम- ०८
एनसीपी – ०३
एसपी -०२
एनसीपी शप – ०१
