MLA Ramdas Masram Case: गडचिरोली जिल्ह्यातील देसाईगंज परिसरात मुरुम उत्खननावरून झालेल्या वादात एक धक्कादायक वळण आले आहे. आरमोरी विधानसभेचे काँग्रेस आमदार रामदास मसराम आणि त्यांच्या ५ सहकाऱ्यांनी एका मजुराला बेदम मारहाण केल्याचा आरोप झाला असून, या प्रकरणी देसाईगंज पोलीस ठाण्यात गुन्हा नोंदवण्यात आला आहे. या घटनेमुळे जिल्ह्याच्या राजकीय वर्तुळात मोठी खळबळ उडाली आहे.
नेमकी घटना काय?
जिल्ह्यातील कोंढाळा भागात रेल्वेच्या कामासाठी मुरुमाचे उत्खनन सुरू आहे. हे काम सुरू असताना आमदार मसराम आपल्या समर्थकांसह तिथे पोहोचले. मुरुम उपसा करण्याच्या परवानगीवरून त्यांचे तिथे उपस्थित असलेल्या मजुरांशी भांडण झाले.
- तक्रारदाराचा दावा: कुणाल राजगडे या मजुराने पोलिसांना सांगितले की, “आम्ही तहसीलची परवानगी असल्याचे सांगितले आणि कंत्राटदाराशी बोलण्यास सुचवले. मात्र, यावरून आमदारांच्या सोबत असलेल्या जमावाने चिडून काठीने आणि हाताबुक्क्यांनी मला बेदम मारले.”
- जखमी मजूर: या मारहाणीत कुणाल गंभीर जखमी झाला असून, त्याच्यावर गडचिरोली जिल्हा सामान्य रुग्णालयात उपचार सुरू आहेत.
पोलिसांनी कोणावर गुन्हे दाखल केले?
कुणालच्या तक्रारीवरून पोलिसांनी आमदार रामदास मसराम यांच्यासह खालील व्यक्तींवर गुन्हे दाखल केले आहेत:
- धनपाल मिसार (निवृत्त शिक्षक)
- अमोल मिसार
- सागर वाढई
- ज्ञानदेव पिलारे
- विजय भुरले (चालक)
आमदार मसराम यांची बाजू
दुसरीकडे, आमदार रामदास मसराम यांनी मारहाणीचे सर्व आरोप फेटाळून लावले आहेत. “स्थानिक शेतकऱ्यांनी मुरुम उत्खननाबाबत तक्रारी केल्या होत्या, त्यामुळे लोकप्रतिनिधी म्हणून मी तिथे केवळ परिस्थिती पाहण्यासाठी गेलो होतो. उलट तिथल्या मजुरांनीच आमच्याशी हुज्जत घातली आणि अंगावर धावून येण्याचा प्रयत्न केला. मारहाणीचा आरोप पूर्णपणे खोटा आणि निराधार आहे,” अशी प्रतिक्रिया आमदारांनी दिली आहे.
देसाईगंज पोलीस या प्रकरणाचा पुढील तपास करत असून, मुरुम उत्खननाच्या वैधतेचीही पडताळणी केली जात आहे.
