Devendra Fadnavis on Satara drugs : मागच्या काही दिवसांपासून ड्रग्स प्रकरण जोरदार गाजताना दिसत आहे. साताऱ्यातील महाबळेश्वर परिसरात असणाऱ्या सावरी गावात काही दिवसांपूर्वी १४५ कोटींचा ड्रग्जचा साठा सापडला होता. ड्रग्ज सापडलेली जागा उपमुख्यमंत्री एकनाथ शिंदे (Eknath Shinde) यांचे बंधू प्रकाश शिंदे यांच्या मालकीची असल्याचा आरोप ठाकरे गटाच्या नेत्या सुषमा अंधारे (Sushma Andhare) यांनी पत्रकार परिषदेत केला होता.
या पार्श्वभूमीवर आज मुंबईत प्रसारमाध्यमांशी बोलताना मुख्यमंत्री देवेंद्र फडणवीस (Devendra Fadnavis) यांनी देखील या प्रकरणावर भाष्य केलं आहे. देवेंद्र फडणवीस यांनी एकनाथ शिंदे यांची पाठराखण केली आहे. याप्रकरणात विरोधक एकनाथ शिंदे यांचे नाव जाणीवपूर्वक गोवत असल्याचे देखील मुख्यमंत्री देवेंद्र फडणवीस यांनी सांगितले. (Satara Drugs Case)
पुढे ते म्हणतात साताऱ्यात पोलिसांनी धाड टाकून ड्रग्जचा इतका मोठा साठा जप्त केला, त्यासाठी मी सर्वप्रथम पोलीस दलाचे अभिनंदन करतो. जो अवैध धंदा चालला होता, त्याचा पर्दाफाश पोलिसांनी केला. या प्रकरणात जाणीवपूर्वक एकनाथ शिंदेंचं नाव गोवण्याचा प्रयत्न केला जात आहे,आणि तो अत्यंत चुकीचा आहे. आतापर्यंत समोर आलेल्या पुराव्यात एकनाथ शिंदे यांच्या परिवाराचा संबंध आद्यपही आढळून आलेला नाही. आम्ही याप्रकरणाची पूर्ण चौकशी करत आहोत, असे देखील देवेंद्र फडणवीस यांनी म्हटले.
Sushma Andhare : मुख्यमंत्रीच्या विधानावर सुषमा अंधारेंचा पलटवार
माननीय मुख्यमंत्र्यांची तळमळ मी समजू शकते, त्यांनी असा खोटा कळवळा दाखवू नये. असा पलटवार सुषमा अंधारे यांनी केला आहे. त्यांना एकनाथ शिंदे यांच्याविषयी किती कळवळा आहे, त्यांना संपवण्यासाठी ते काय प्रयत्न करत आहेत, हे सांगण्यासाठी त्यांनी मला भाग पाडू नये. असे देखील त्या म्हणाल्या. पुढे देखील त्या म्हणतात दुसरी गोष्ट म्हणजे मुख्यमंत्र्यांना संविधानाचा आदर आहे की नाही, हे सांगावे.
संविधानाने न्यायव्यवस्था दिली आहे, कोण बरोबर कोण चूक हे ठरवण्याचे अधिकार त्यांचा आहे. त्यामुळे मुख्यमंत्र्यांनी स्वत: न्यायाधीश होण्याचा प्रयत्न करु नये असा टोला देखील त्यांनी लगावला आहे. तुम्ही न्यायाधीश असाल तर सगळी न्यायालयं बंद करा आणि तुमच्या कार्यालयाबाहेर पाटी लावून ठेवा, इथे क्लीन चिट मिळतील असं मिश्किल वक्तव्य त्यांनी केलं आहे. पुढे त्या सांगतात एकनाथ शिंदेंचा याप्रकरणात संबंध आहे, असे माझे म्हणणे नसून मी प्रकाश शिंदे यांच्याबद्दल बोलत आहे.असे सुषमा अंधारे यांनी म्हटले.
हे देखील वाचा –Bangladesh Violence : कट्टरपंथी नेता शरीफ हादीच्या मृत्यूनंतर बांगलादेश पेटला, ढाकामध्ये लष्कर तैनात; भारताचा हाय-अलर्ट
