Dharashiv Election Result 2025 : राज्यभरातील नगरपरिषद आणि नगरपंचायत निवडणुकांचे मतदान काल पार पडले त्यामुळे आता राज्यात उत्सुकता आहे ती मतमोजणीची.आज मतमोजणी पार पडत आहे. त्यामुळे सर्वच राजकीय पक्षांतील उमेदवारांमध्ये प्रचंड धाकधूक निर्माण झाल्याचे देखील पाहायला मिळते. कार्यकर्ते आणि समर्थकांमध्ये निकालाबाबतची उत्सुकता देखील प्रचंड पाहायला मिळते.
अनेक ठिकाणी तर निकालाआधीच विजयाच्या तयारीला देखील सुरुवात झाली असून, काही ठिकाणी तणावपूर्ण वातावरण देखील निर्माण झाले आहे. तर धाराशिवमध्ये (Dharashiv Nagarparishad Election Result 2025) तर निकालापूर्वीच भाजपकडून (BJP) गुलालाची खरेदी करण्यात आली आहे.
राणाजगजितसिंह पाटील, ओमराजे निंबाळकरांची प्रतिष्ठा पणाला:
धाराशिवमध्ये निकाल जाहीर होण्यापूर्वीच भाजपा कडून विजयाची तयारी सुरू झाली आहे. भाजप आमदार राणा जगजीतसिंह पाटील यांच्या संपर्क कार्यालयात गुलालाच्या गोण्या आणून ठेवल्याचे चित्र सध्या आहे.
याच दरम्यान, गणेशोत्सवाच्या काळात खासदार ओमराजे निंबाळकर यांना उद्देशून वापरण्यात आलेले एक गाणे वापरत एक सोशल मीडिया पेजवर गुलालाच्या पोत्यांचा व्हिडिओ पोस्ट करण्यात आला आहे. यामुळे राजकीय वर्तुळात मात्र चांगलीच चर्चा रंगली आहे.
धाराशिव नगरपरिषदेसाठी शिवसेना ठाकरे गट आणि भाजपा यांच्यात थेट लढत होत असून, राष्ट्रवादी काँग्रेस शरद पवार गटाचा स्वतंत्र उमेदवार रिंगणात असल्याने येथे तिरंगी लढत देखील पाहायला मिळत आहे. या निवडणुकीत दोन तोडीस तोड असे उमेदवार एकमेकांच्या विरोधात उभे असल्याने हि लढत प्रचंड प्रतिष्ठेची बनली आहे.
तुळजापुरात कडेकोट बंदोबस्त
दरम्यान, तुळजापुरातील तणावपूर्ण वातावरणाच्या पार्श्वभूमीवर मतमोजणीसाठी नळदुर्ग रोडवर सर्वसामान्य नागरिकांच्या प्रवेशावर बंदी घातली गेली आहे. सावरकर चौक ते हेलिपॅड कॉर्नर या रस्त्यावर सकाळी आठ वाजल्यापासून दुपारी दोन वाजेपर्यंत प्रवेशबंदीचे देखील आदेश जारी करण्यात आले आहेत. काही दिवसांपूर्वी दोन गटांमध्ये झालेल्या राड्यानंतर पोलीस प्रशासन अलर्ट मोडवर आल्याचे दिसून येत आहे, मतमोजणीसाठी तुळजापुरात तीन स्तरांचा कडेकोट पोलीस बंदोबस्त तैनात केला आहे.
दंगल नियंत्रण पथक, एसआरपीएफची टीम, तसेच तीन पोलीस पेट्रोलिंग वाहनांद्वारे दिवसभर शहरात गस्त देखील घातली जाणार आहे. यासोबतच सुमारे १०० पोलीस कर्मचारी, १० वरिष्ठ पोलीस अधिकारी आणि ६० होमगार्ड यांचा बंदोबस्त लावण्यात आला आहे.
तुळजापुरातील नगरपरिषद निवडणुकीची मतमोजणी तुळजाभवानी अभियांत्रिकी महाविद्यालयात केली जात आहे. नगराध्यक्ष पदाच्या उमेदवारीवरून काँग्रेसचे उमेदवार अमर मगर यांचे बंधू ऋषी मगर आणि भाजपचे उमेदवार पिटू गंगणे यांच्यात काही दिवसांपूर्वी वाद रंगला होता.
या वादाचे रूपांतर राड्यात झाल्यानंतर या घटनेत गोळीबार आणि कोयत्याने हल्ला झाल्याचा गंभीर प्रकार उघडकीस आला. या प्रकरणी काँग्रेस उमेदवार अमर मगर यांचे बंधू तसेच हल्ल्यात जखमी झालेले कुलदीप मगर यांच्या तक्रारीवरून तुळजापूर पोलीस ठाण्यात गुन्हा दाखल केला आहे. आतापर्यंत या प्रकरणात आठ आरोपींना अटक करण्यात आल्याची माहिती पोलिसांकडून मिळाली आहे.
हे देखील वाचा – Helpline Numbers: संकटाच्या वेळी उपयोगी येतील ‘हे’ क्रमांक! प्रत्येक महिलेच्या फोनमध्ये असायलाच हवेत 5 महत्त्वाचे हेल्पलाईन नंबर्स
