Eknath Khadse : उत्तर महाराष्ट्राच्या राजकारणातील ज्येष्ठ नेते आणि राष्ट्रवादी काँग्रेसचे (शरद पवार गट) प्रभावी व्यक्तिमत्व एकनाथ खडसे यांच्यासह त्यांच्या कन्या शारदा खडसे यांच्यावर कायदेशीर कारवाईचा बडगा उगारण्यात आला आहे. जळगाव जिल्ह्यातील बोदवड पोलीस ठाण्यात खडसे पिता-कन्येविरोधात फसवणुकीचा गंभीर गुन्हा दाखल करण्यात आल्याने राजकीय वर्तुळात मोठी खळबळ उडाली आहे. साखर कारखाना उभारण्याच्या नावाखाली शेतकऱ्यांची दिशाभूल करून त्यांच्या महार वतनाच्या जमिनी हडपल्याचा ठपका त्यांच्यावर ठेवण्यात आला आहे.
दोन दशकांपूर्वीचे ‘ते’ आश्वासन आणि आजचा गुन्हा; एकनाथ खडसेंवरील जमीन फसवणूक प्रकरणाचा सविस्तर उलगडा
हे प्रकरण साधारणतः २००२ सालातील आहे. हे संपूर्ण प्रकरण भुसावळ तालुक्यातील मानपूर शिवारातील एका जमिनीच्या व्यवहाराशी संबंधित आहे. अधिकच्या माहितीनुसार, भुसावळ तालुक्यातील मानपूर शिवारातील गट क्रमांक १२२ ही जमीन मूळची ‘महार वतन’ प्रकारातील होती. या जमिनीची मालकी चमेलाबाई तुकाराम तायडे आणि त्यांच्या वारसदारांकडे होती. फिर्यादीने केलेल्या दाव्यानुसार, २००२ मध्ये एकनाथ खडसे यांनी या परिसरात ‘तापी-पूर्णा सहकारी साखर कारखाना’ उभारण्याचे भव्य स्वप्न स्थानिक शेतकऱ्यांना दाखवले होते. हा कारखाना झाल्यास परिसराचा कायापालट होईल, असे आमिष त्यावेळी दाखवण्यात आले होते.
रोजगार आणि मोबदल्याचे आमिष-
जमिनीचा व्यवहार करताना केवळ पैशांचा मोबदलाच नव्हे, तर सामाजिक आणि आर्थिक प्रगतीचे आश्वासनही देण्यात आले होते. शिवाय त्यांच्या कुटुंबातील सदस्यांना या प्रस्तावित साखर कारखान्यात कायमस्वरूपी रोजगार देखील उपलब्ध करून दिला जाईल. या आश्वासनावर विश्वास ठेवून तायडे कुटुंबाने जमिनीच्या व्यवहाराला संमती दिली होती.
अशिक्षितपणाचा गैरफायदा आणि कागदपत्रांत फेरफार; एकनाथ खडसेंवरील जमीन व्यवहारातील फसवणुकीचा धक्कादायक खुलासा-
तक्रारदार चमेलाबाई तायडे यांनी केलेल्या दाव्यानुसार, खडसे यांनी त्यांच्या अशिक्षितपणाचा आणि अज्ञानाचा गैरफायदा घेऊन जमिनीचा व्यवहार पूर्ण केला. केवळ ५१ हजार रुपयांची नाममात्र रक्कम आगाऊ (Advance) देऊन आणि कुटुंबातील सदस्यांचे अंगठे घेऊन हा व्यवहार बोदवड येथील दुय्यम निबंधक कार्यालयात नोंदवण्यात आला होता.
कारखान्याचे नाव आणि वैयक्तिक मालकीचा बनाव-
जमिनीचा व्यवहार करताना तो ‘तापी-पूर्णा सहकारी साखर कारखान्या’साठी होत असल्याचे भासवण्यात आले होते. चमेलाबाई तायडे यांच्या म्हणण्यानुसार, सार्वजनिक हिताचा प्रकल्प उभा राहणार या विश्वासापोटी त्यांनी जमिनीवर आपले हक्क सोडले होते. मात्र, अनेक दशके उलटूनही नियोजित ठिकाणी कोणत्याही कारखान्याचे अस्तित्व दिसले नाही. या प्रदीर्घ काळानंतर, २०२५ मध्ये जेव्हा तायडे कुटुंबाने या जमिनीच्या कागदपत्रांची सखोल छाननी केली, तेव्हा त्यांना मोठा धक्का बसला.
शारदा खडसे यांच्या नावावर जमिनीचे हस्तांतरण-
तपासणीअंती असे निष्पन्न झाले की, ही जमीन ज्या सहकारी साखर कारखान्याच्या नावावर असणे अपेक्षित होते, त्याऐवजी ती एकनाथ खडसे यांच्या कन्या शारदा एकनाथ खडसे यांच्या वैयक्तिक नावावर हस्तांतरित करण्यात आली आहे. मूळ मालकांना अंधारात ठेवून आणि साखर कारखान्याचे केवळ आमिष दाखवून ही मोक्याची जमीन खासगी मालमत्ता म्हणून हडपल्याचा आरोप आता तक्रारदारांनी केला आहे.
खरेदीखतातील कागदपत्रांची पडताळणी-
११ फेब्रुवारी २०२६ रोजी झाला, जेव्हा तायडे कुटुंबाने या जमिनीच्या मूळ खरेदीखताची अधिकृत प्रत काढून तिची सखोल तपासणी करण्यात आली. या प्रक्रियेत अत्यंत धक्कादायक बाब समोर आली. खरेदीखताच्या मूळ दस्तऐवजात ज्या ठिकाणी ‘तापी-पूर्णा शुगर अँड अलाईड इंडस्ट्रीज’ या प्रस्तावित साखर कारखान्याचे नाव नमूद होते, त्या नावावर खाडाखोड करण्यात आल्याचे दिसून आले. या खाडाखोडीनंतर त्या जागी अत्यंत चलाखीने ‘शारदा एकनाथ खडसे’ असे वैयक्तिक नाव समाविष्ट करण्यात आले आहे.
प्रशासकीय दाद आणि राजकीय पाठबळ-
आपल्या हक्काच्या जमिनीवर अशा प्रकारे डल्ला मारण्यात आल्याचे लक्षात येताच, तायडे कुटुंबाने या अन्यायाविरोधात आवाज उठवण्याचा निर्णय घेतला. रिपब्लिकन पार्टी ऑफ इंडिया (आठवले गट) चे जिल्हाध्यक्ष अनिल अडकमोल यांच्या मार्गदर्शनाखाली पीडित कुटुंबाने थेट जिल्हाधिकाऱ्यांकडे धाव घेतली. कागदपत्रांमधील ही उघड फेरफार आणि प्रशासकीय यंत्रणेचा झालेला संभाव्य गैरवापर, याकडे जिल्हा प्रशासनाचे लक्ष वेधण्यात आले आहे.
एकनाथ खडसे यांच्यासह कन्या शारदा खडसे यांच्यावर गुन्हा दाखल-
सुमारे दोन दशकांपूर्वीच्या या जमिनीच्या खरेदी-विक्री व्यवहारात झालेल्या कथित फसवणुकीची जिल्हाधिकाऱ्यांनी गंभीर दखल घेतली असून, त्यांच्या निर्देशानुसार बोदवड पोलीस ठाण्यात रीतसर गुन्हा नोंदवण्यात आला आहे.
जिल्हाधिकाऱ्यांची हस्तक्षेप आणि चौकशीचे आदेश-
तक्रारदार चमेलाबाई तायडे आणि रिपाइं (आठवले गट) यांनी पुराव्यांसह सादर केलेल्या तक्रारीची व्याप्ती पाहता, जिल्हाधिकाऱ्यांनी या प्रकरणाच्या सखोल चौकशीचे आदेश पोलीस अधीक्षकांना दिले होते. प्राथमिक चौकशीत खरेदीखतातील खाडाखोड आणि नावातील फेरफार यांसारख्या तांत्रिक बाबी प्रथमदर्शनी संशयास्पद आढळल्या. या चौकशीअंती प्राप्त झालेल्या अहवालाच्या आधारे, चमेलाबाई तायडे यांच्या फिर्यादीवरून पोलिसांनी गुन्ह्याची नोंद केली आहे.
