Election petitions – राज्यातील स्थानिक स्वराज्य संस्थांच्या निवडणुकांशी संबंधित विविध याचिकांवर (Election petitions) भिन्न खंडपीठांनी दिलेल्या स्थगिती आदेशांची माहिती मुख्य खंडपीठाला न देण्यात आल्याने उच्च न्यायालयाने नाराजी व्यक्त केली असून, आता सर्व याचिकांची एकत्रित सुनावणी ९ डिसेंबरला होणार आहे.
नागपूर, औरंगाबाद आणि कोल्हापूर खंडपीठांनी २ डिसेंबर रोजी मतमोजणी व निकालांना दिलेल्या अंतरिम स्थगितीची माहिती राज्य सरकार आणि राज्य निवडणूक आयोगाकडून मुख्य खंडपीठाला न दिल्याने मुख्य न्यायमूर्तींनी तीव्र नाराजी व्यक्त केली. निवडणुकांशी संबंधित याचिकांवर विविध खंडपीठांत वेगवेगळे आदेश दिले जाणे योग्य नसल्याचे न्यायालयाने स्पष्ट केले. दरम्यान, बारामती निवडणुकीशी संबंधित तीन याचिकाही खंडपीठासमोर आल्या. नामांकन प्रक्रियेत अडथळे आल्याने सत्र न्यायालयाने दिलेल्या आदेशांवरून निवडणूक पुढे ढकलण्यात आली होती. यापुढे निवडणुकांशी संबंधित सर्व याचिकांची सुनावणी मुख्य न्यायमूर्तींच्या अध्यक्षतेखालील खंडपीठातच केली जाईल, असे न्यायालयाने सांगितले आहे . पुढील सुनावणी ९ डिसेंबर रोजी होणार आहे.
