Hardik Pandya Warning Rohit Sharma : जगप्रसिद्ध ‘इंडियन प्रीमियर लीग’च्या (IPL 2026) १९ व्या हंगामाचा रणसंग्राम २८ मार्चपासून सुरू होत आहे. या क्रिकेट महोत्सवासाठी सर्व संघांनी कंबर कसली असतानाच, पाच वेळा विजेतेपद पटकावणाऱ्या मुंबई इंडियन्स (Mumbai Indians) संघाबाबत सोशल मीडियावर एक खळबळजनक चर्चा रंगली होती. कर्णधार हार्दिक पांड्या आणि माजी कर्णधार रोहित शर्मा यांच्यातील कथित वादाच्या या दाव्याने चाहत्यांमध्ये चिंतेचे वातावरण निर्माण झाले होते, मात्र आता संघ प्रशासनाने यावर अधिकृत मौन सोडले आहे.
सोशल मीडियावरील ‘त्या’ पोस्टचा नेमका दावा काय?
गेल्या काही दिवसांपासून सोशल मीडियावर एका पोस्टने सर्वांचे लक्ष वेधून घेतले होते. या पोस्टमध्ये असा दावा करण्यात आला होता की, आगामी हंगामात जर रोहित शर्माची बॅट तळपली नाही, तर ते खपवून घेतले जाणार नाही, असा इशारा हार्दिक पांड्याने दिला आहे. इतकेच नव्हे तर, रोहितच्या खराब कामगिरीमुळे त्याचे अंतिम ११ खेळाडूंमधील (Playing-11) स्थानही धोक्यात येऊ शकते आणि याबाबत हार्दिकने संघ व्यवस्थापनाला (Team Management) स्पष्ट कल्पना दिली आहे, असेही या पोस्टमध्ये नमूद करण्यात आले होते.
सदर पोस्टमध्ये रोहितच्या गेल्या १०-१२ वर्षांतील कामगिरीवर व्यवस्थापन नाराज असल्याचे सांगण्यात आले होते. सर्वाधिक मानधन घेणाऱ्या खेळाडूंच्या यादीत असूनही रोहितने अनेक हंगामांत केवळ २०० ते ३०० धावाच केल्या असून त्यांचा स्ट्राईक रेट १२० च्या आसपास राहिला आहे, असा तांत्रिक दावाही यात करण्यात आला होता.
मुंबई इंडियन्सची ‘दोन शब्दांत’ चोख प्रत्युत्तर
ही दिशाभूल करणारी बातमी वाऱ्यासारखी पसरल्यानंतर मुंबई इंडियन्सच्या अधिकृत सोशल मीडिया हँडलने यावर तातडीने प्रतिक्रिया दिली. फ्रँचायझीने त्या पोस्टवर अत्यंत थोडक्यात पण स्पष्ट शब्दांत “काहीही!” अशी कमेंट केली. या एका शब्दातून संघ व्यवस्थापनाने हे सर्व दावे पूर्णपणे बिनबुडाचे, तथ्यहीन आणि खोटी अफवा असल्याचे स्पष्ट केले आहे. यामुळे खेळाडूंमध्ये कोणत्याही प्रकारचा विसंवाद नसल्याचे चित्र आता स्पष्ट झाले आहे.
रोहित शर्माची आकडेवारी आणि नेतृत्व
रोहित शर्माने फलंदाजीमध्ये २०१३ नंतर ५०० धावांचा टप्पा गाठला नसला तरी, त्याच्या नावावर पाच वेळा विजेतेपद मिळवून देणाऱ्या यशस्वी कर्णधाराचा विक्रम आहे. मागील हंगामाचा विचार केल्यास, रोहितने १५ सामन्यांमध्ये २९.८६ च्या सरासरीने ४१८ धावा केल्या होत्या, ज्यामध्ये चार महत्त्वपूर्ण अर्धशतकांचा समावेश होता. रोहितच्या अनुभवाचा आणि स्फोटक फलंदाजीचा मुंबई इंडियन्सला नेहमीच फायदा झाला आहे.
