Jalgaon Election Result: राज्यातील २९ महानगरपालिकांच्या निवडणुकीत भाजपने अनेक ठिकाणी मुसंडी मारली असली, तरी जळगावमध्ये एका आगळ्यावेगळ्या विजयाची चर्चा रंगली आहे. जळगावचे माजी महापौर ललित कोल्हे यांनी कारागृहात असूनही निवडणूक जिंकण्याचा पराक्रम केला आहे. विशेष म्हणजे, केवळ ललित कोल्हेच नाही तर त्यांच्या कुटुंबातील इतर दोन सदस्यांनीही या निवडणुकीत बाजी मारली असून कोल्हे कुटुंबाने ‘हॅट्ट्रिक’ साधली आहे.
बोगस कॉल प्रकरणात सध्या नाशिकच्या कारागृहात शिक्षा भोगत असलेल्या ललित कोल्हे यांनी शिवसेना (शिंदे गट) कडून प्रभाग क्रमांक 11 मधून मैदानात उतरण्याचा निर्णय घेतला होता. प्रत्यक्ष प्रचारात नसूनही मतदारांनी त्यांच्यावर विश्वास दाखवल्याने राजकीय वर्तुळात सर्वांच्या भुवया उंचावल्या आहेत.
जळगावमध्ये ‘कोल्हे पॅटर्न’चा डंका
ललित कोल्हे यांच्या अनुपस्थितीत त्यांच्या समर्थकांनी आणि कुटुंबाने प्रचाराची धुरा सांभाळली होती. या निवडणुकीत कोल्हे कुटुंबातील ३ सदस्य रिंगणात होते आणि तिघांनीही विजय मिळवला आहे:
- ललित कोल्हे: प्रभाग क्रमांक 11 मधून विजयी (नाशिक कारागृहातून निवडणूक लढवली).
- पियुष कोल्हे (मुलगा): प्रभाग क्रमांक 4 मधून विजय संपादन केला.
- सिंधू कोल्हे: कुटुंबातील तिसऱ्या सदस्य म्हणून त्यांनीही विजयावर मोहोर उमटवली.
कुटुंबियांच्या डोळ्यात आनंदाश्रू
कारागृहातून मिळालेल्या या विजयाची बातमी समजताच जळगावमध्ये कोल्हे समर्थकांनी जल्लोष केला. ललित कोल्हे यांच्या पत्नी सरिता कोल्हे यांनी या विजयानंतर भावना अनावर होत सांगितले की, “हा विजय म्हणजे त्यांच्या आजवरच्या कामाची पोहोचपावती आहे.” महाविकास आघाडीचे तगडे आव्हान समोर असतानाही कोल्हे कुटुंबाने मिळवलेला हा विजय जळगावच्या राजकारणात मैलाचा दगड ठरला आहे.
राज्यातील पुणे, मुंबई आणि पिंपरी-चिंचवडसारख्या महत्त्वाच्या महापालिकांमध्ये भाजपने वर्चस्व राखले असले, तरी जळगावमधील या निकालाने सर्वांचे लक्ष वेधून घेतले आहे.
