KKR vs LSG : आयपीएल २०२६ च्या हंगामात आज कोलकाता नाईट रायडर्स (KKR) आणि लखनऊ सुपर जायंट्स (LSG) हे दोन बलाढ्य संघ आमनेसामने येणार आहेत. कोलकात्याच्या ऐतिहासिक ईडन गार्डन्स मैदानावर हा सामना पार पडणार असून, दोन्ही संघांसाठी हा विजय अत्यंत महत्त्वाचा आहे. या हंगामात आतापर्यंत कोलकात्याची कामगिरी समाधानकारक राहिलेली नाही; खेळलेल्या तीन सामन्यांपैकी दोन सामन्यांत त्यांना पराभवाचा धक्का बसला आहे, तर एक सामना पावसामुळे रद्द झाला आहे. दुसरीकडे, लखनऊच्या संघाने संमिश्र कामगिरी करत एक विजय आणि एक पराभव पदरी पाडून घेतला आहे.
हवामान आणि खेळपट्टीचा अंदाज-
ईडन गार्डन्सची खेळपट्टी फलंदाज आणि गोलंदाज दोघांसाठीही पूरक ठरेल असे मानले जाते. सामन्याच्या सुरुवातीच्या षटकांत वेगवान गोलंदाजांना खेळपट्टीकडून चांगली मदत मिळण्याची शक्यता आहे. मात्र, या सामन्यावर पावसाचे मोठे सावट आहे. गुरुवारी या भागात ‘यलो अलर्ट’ देण्यात आला असून मेघगर्जनेसह पावसाचा अंदाज वर्तवण्यात आला आहे. ‘अॅक्यूवेदर’नुसार पावसाची शक्यता असली, तरी प्रत्यक्ष सामन्याच्या वेळी वातावरण निवळण्याची आशा आहे. गेल्या काही दिवसांपासून होत असलेल्या पावसामुळे मैदानाच्या ‘आऊटफील्ड’वर परिणाम होऊ शकतो, त्यामुळे नाणेफेक जिंकणारा कर्णधार प्रथम गोलंदाजीला प्राधान्य देईल.
परस्पर सांख्यिकी आणि ऐतिहासिक रेकॉर्ड (Head to Head)-
दोन्ही संघांमधील आतापर्यंतच्या रेकॉर्डचा विचार केल्यास लखनऊचे पारडे जड दिसते. कोलकाता आणि लखनऊ यांच्यात आतापर्यंत ६ सामने खेळले गेले असून, त्यापैकी ४ सामन्यांत लखनऊने विजय मिळवला आहे, तर कोलकात्याला केवळ २ सामने जिंकता आले आहेत. विशेष म्हणजे, आपल्या घरच्या मैदानावरही कोलकात्याला लखनऊविरुद्ध फारसे यश मिळालेले नाही; ईडन गार्डन्सवरील ४ सामन्यांपैकी ३ सामने लखनऊने जिंकले आहेत. कोलकात्याचे दोन्ही विजय श्रेयस अय्यरच्या नेतृत्वाखाली मिळाले आहेत, ही त्यांच्यासाठी जमेची बाजू आहे.
मोहम्मद शमीचे आव्हान आणि संभाव्य बदल-
कोलकाता संघासाठी आजचा सामना सोपा नसेल. लखनऊचा प्रमुख गोलंदाज मोहम्मद शमी सध्या उत्कृष्ट फॉर्ममध्ये असून तो मूळचा बंगालचा असल्याने ईडन गार्डन्सच्या परिस्थितीचा त्याला दांडगा अनुभव आहे. चेंडू स्विंग करण्याच्या त्याच्या कलेमुळे कोलकात्याच्या फलंदाजांची मोठी कसोटी लागणार आहे. पॉवरप्लेमध्ये अचूक मारा करणे ही लखनऊची ताकद राहिली आहे.
