LCA Tejas: संरक्षण मंत्री राजनाथ सिंह यांनी हिंदुस्तान एरोनॉटिक्स लिमिटेडच्या (HAL) नाशिक येथील प्रकल्पात लाइट कॉम्बॅट एअरक्राफ्ट (LCA) Tejas Mk1A च्या 3ऱ्या उत्पादन लाइनचे उद्घाटन केले. स्वदेशी बनावटीच्या या लढाऊ विमानाचे उत्पादन वाढवण्याच्या दृष्टीने हे एक महत्त्वाचे पाऊल आहे.
मिग (MiG) लढाऊ विमानांच्या सेवानिवृत्तीमुळे हवाई दलाच्या लढाऊ तुकड्यांमध्ये जी पोकळी निर्माण झाली आहे, ती भरून काढण्यासाठी एलसीए तेजस (LCA Tejas) महत्त्वाची भूमिका बजावणार आहे.
संरक्षण मंत्रालयाने दिलेल्या माहितीनुसार, “ही तिसरी लाइन पूर्ण क्षमतेने सुरू झाली असून, दरवर्षी 8 विमानांचे उत्पादन करू शकते. या लाइनच्या उद्घाटनानंतर एचएएलची एकूण वार्षिक उत्पादन क्षमता आता 24 विमानांपर्यंत पोहोचेल.”
भारतीय हवाई दलात स्क्वॉड्रनची घट:
हा निर्णय अशा वेळी आला आहे, जेव्हा भारतीय हवाई दलातील लढाऊ विमानांची संख्या कमी होत असल्याने चिंता व्यक्त केली जात आहे. मिग-21 ची शेवटची तुकडी (स्क्वॉड्रन 23) सप्टेंबरमध्ये सेवानिवृत्त झाली, ज्यामुळे सध्या हवाई दलातील लढाऊ स्क्वॉड्रनची संख्या 30 च्या खाली आली आहे. हवाई दलाला संभाव्य ऑपरेशनल आव्हाने पूर्ण करण्यासाठी 42 लढाऊ स्क्वॉड्रनची आवश्यकता असते.
Tejas Mk1A ची वैशिष्ट्ये:
प्रगत LCA Mk1A मध्ये उत्तम एईएसए रडार, स्वयं रक्षा कवच आणि कंट्रोल ॲक्च्युएटर्सचा समावेश आहे. यात 64 टक्क्यांहून अधिक स्वदेशी घटक आणि 67 नवीन स्वदेशी कंपोनंट्सचा वापर करण्यात आला आहे.
संरक्षण मंत्र्यांनी याच कार्यक्रमात हिंदुस्तान टर्बो ट्रेनर-40 च्या 2 ऱ्या उत्पादन लाइनचे उद्घाटन केले आणि नाशिक प्रकल्पात तयार झालेले पहिले LCA Mk1A विमान हिरवा झेंडा दाखवून रवाना केले.
संरक्षण क्षेत्रात ‘आत्मनिर्भर भारत’
संरक्षण मंत्र्यांनी आपल्या भाषणात तेजस विमानाचे उड्डाण हे संरक्षण क्षेत्रात भारताची वाढत असलेली आत्मनिर्भरता दर्शवते, असे स्पष्ट केले.
सरकारने 2029 पर्यंत संरक्षण उत्पादन 3 लाख कोटी रुपये आणि निर्यात 50,000 कोटी रुपये करण्याचे लक्ष्य ठेवले आहे.
LCA Tejas Mk1A हे हवाई संरक्षण, सागरी टेहळणी आणि स्ट्राइक ऑपरेशन्ससाठी डिझाइन केलेले हलके, सिंगल-इंजिन, मल्टीरोल विमान आहे. यात अद्ययावत ॲव्हिओनिक्स, प्रगत इलेक्ट्रॉनिक वॉरफेअर सूट आणि बियॉन्ड व्हिज्युअल रेंज क्षेपणास्त्रक्षमता असेल. भारतीय हवाई दलाने 2021 मध्ये 46,000 कोटी रुपये खर्चून 83 LCA Tejas Mk1A विमानांची ऑर्डर दिली आहे.
हे देखील वाचा – देशातील सर्वाधिक विकल्या जाणाऱ्या बाईकवर खास ऑफर; दिवाळीला खूपच स्वस्तात खरेदीची संधी
