Leopard Attacks : सातारा जिल्ह्यातील कराड तालुक्यातून एक हृदयद्रावक आणि थरारक घटना समोर आली आहे. काँग्रेसचे ज्येष्ठ नेते तथा माजी सहकार मंत्री स्वर्गीय विलासराव पाटील (काका) उंडाळकर यांचे नातू अधिराज पाटील यांच्यावर बिबट्याने प्राणघातक हल्ला केला आहे. या हल्ल्यात अधिराज यांच्या पायाला गंभीर दुखापत झाली असून, सध्या त्यांच्यावर वैद्यकीय उपचार सुरू आहेत.
निवडणुकीच्या प्रचारादरम्यान बिबट्याचा थरार
कराड तालुक्यातील उंडाळे–शेवाळवाडी मार्गावर शनिवारी रात्री साडेआठ वाजेच्या सुमारास ही घटना घडली. अधिराज पाटील यांचे वडील आणि राष्ट्रवादी काँग्रेसचे (अजित पवार गट) नेते उदयसिंह पाटील उंडाळकर हे येळगाव जिल्हा परिषद गटातून निवडणूक लढवत आहेत. आपल्या वडिलांचा प्रचार आटोपून अधिराज हे सहकारी धनाजी पाटील यांच्यासह दुचाकीवरून घरी परतत होते. यावेळी रस्त्याच्या कडेला दबा धरून बसलेल्या बिबट्याने त्यांच्यावर झडप घातली. दुचाकी चालवत असलेले धनाजी पाटील हे सुदैवाने या हल्ल्यातून बचावले, मात्र मागे बसलेल्या अधिराज यांच्या पायाला बिबट्याच्या नख्या आणि दातांमुळे जखम झाली.
तातडीने उपचार आणि प्रकृतीची स्थिती
हल्ल्यानंतर परिसरात एकच खळबळ उडाली. स्थानिक नागरिकांनी प्रसंगावधान राखून अधिराज यांना तातडीने उंडाळे येथील ग्रामीण रुग्णालयात दाखल केले. रुग्णालयातील डॉक्टरांनी प्राथमिक उपचार केल्यानंतर त्यांची प्रकृती आता धोक्याबाहेर आणि स्थिर असल्याचे स्पष्ट केले आहे. एका नामांकित राजकीय कुटुंबातील तरुण सदस्यावर अशा प्रकारे हल्ला झाल्याने संपूर्ण कराड तालुक्यात चिंतेचे वातावरण पसरले आहे.
बिबट्याचा वाढता वावर: नागरिकांमध्ये दहशतीचे सावट
उंडाळे आणि लगतच्या परिसरात गेल्या काही दिवसांपासून बिबट्यांचा वावर कमालीचा वाढला आहे. केवळ शेतातच नव्हे, तर आता मुख्य रस्त्यांवरही बिबट्यांचे दर्शन होऊ लागल्याने रात्रीच्या वेळी प्रवास करणे जीवघेणे ठरत आहे. ग्रामीण भागातील लोकवस्तीच्या वेशीपर्यंत बिबट्यांचे आगमन होत असल्याने ‘मानव–वन्यजीव संघर्ष’ आता ऐरणीवर आला आहे. या घटनेमुळे संतप्त झालेल्या ग्रामस्थांनी वन विभागाने तात्काळ पिंजरा लावून संबंधित बिबट्याचा बंदोबस्त करावा, अशी आग्रही मागणी केली आहे.
नसबंदी की संवर्धन? वादाचे नवे तोंड
बिबट्यांच्या वाढत्या संख्येमुळे आणि वारंवार होणाऱ्या हल्ल्यांमुळे काही स्थानिक स्तरांतून बिबट्यांची नसबंदी (Sterilization) करण्यात यावी, अशी मागणी जोर धरत आहे. मात्र, वन्यजीवप्रेमी आणि तज्ज्ञांनी या भूमिकेला तीव्र विरोध दर्शवला आहे. नसबंदी हा नैसर्गिक उपाय नसून, बिबट्यांच्या अधिवासाचे रक्षण करणे आणि मानवी हस्तक्षेप कमी करणे हाच यावरील दीर्घकालीन उपाय आहे.
