Maharashtra Vande Bharat Train: महाराष्ट्राला देशातील सर्वात लांब पल्ल्याची वंदे भारत ट्रेन (Maharashtra Vande Bharat Train) मिळाली आहे. ही महाराष्ट्रात धावणारी 12 वी वंदे भारत ट्रेन (Vande Bharat Train) आहे.
या ट्रेनचे उद्घाटन पंतप्रधान नरेंद्र मोदी यांच्या हस्ते 10 ऑगस्ट रोजी करण्यात येणार आहे. ही नवीन सेमी-हाय-स्पीड ट्रेन मध्य रेल्वेद्वारे चालवली जाईल.
अजनी (नागपूर) ते पुणे वंदे भारत एक्स्प्रेस
महाराष्ट्रातील ही नवीन वंदे भारत एक्स्प्रेस अजनी (नागपूर) ते पुणे या मार्गादरम्यान धावेल. ही ट्रेन 881 किलोमीटरचा प्रवास करेल, ज्यामुळे ती देशातील सर्वात लांब पल्ल्याची वंदे भारत ट्रेन ठरेल.
ही ट्रेन वर्धा-अकोला-शेगाव-भुसावळ-जळगाव-मनमाड आणि पुणतांबा-दौंड या भागातून जाणारी पहिली वंदे भारत ट्रेन असेल. ती ताशी 73 किलोमीटर वेगाने धावेल आणि नागपूर ते पुणे प्रवासादरम्यान 10 ठिकाणी थांबेल, ज्यामुळे हा प्रवास खूप जलद होईल.
व्यावसायिक सेवा कधी सुरू होणार?
पुणे-अजनी-पुणे वंदे भारत एक्स्प्रेस गाडी क्रमांक 26101/26102 म्हणून ओळखली जाईल. तिच्या नियमित व्यावसायिक फेऱ्यांची सुरुवात पुणे स्थानकावरून 11 ऑगस्ट रोजी, तर अजनी स्थानकावरून 12 ऑगस्ट रोजी होईल. ही ट्रेन आठवड्यातून सहा दिवस धावेल.
अजनी (नागपूर) आणि पुणे दरम्यान वंदे भारत सेवा सुरू झाल्यामुळे या दोन शहरांमध्ये आणि मार्गावरील गावांमध्ये प्रवास करणाऱ्या लाखो प्रवाशांना फायदा होईल.
महाराष्ट्रातील वंदे भारत एक्सप्रेस गाड्यांची यादी
- 20101/20102 नागपूर-सिकंदराबाद
- 20669/20670 हुबळी-पुणे
- 20673/20674 कोल्हापूर-पुणे
- 20705/20706 जालना-छत्रपती शिवाजी महाराज टर्मिनस
- 20825/20826 बिलासपूर-नागपूर
- 20901/20902 मुंबई सेंट्रल-गांधीनगर
- 20911/20912 इंदूर-नागपूर
- 22223/22224 छत्रपती शिवाजी महाराज टर्मिनस-साईनगर शिर्डी
- 22225/22226 छत्रपती शिवाजी महाराज टर्मिनस-सोलापूर
- 22229/22230 छत्रपती शिवाजी महाराज टर्मिनस-मडगाव
- 22961/22962 मुंबई सेंट्रल-अहमदाबाद
