Sikandar Shaikh Arrest : महाराष्ट्राच्या कुस्ती क्षेत्रासाठी एक अत्यंत धक्कादायक बातमी समोर आली आहे. आंतरराष्ट्रीय कुस्तीपटू आणि महाराष्ट्र केसरी 2024 चा मानकरी पैलवान सिकंदर शेख याला पंजाब पोलिसांनी अवैध शस्त्र तस्करी आणि आंतरराज्यीय गुन्हेगारी टोळीशी संबंध असल्याच्या आरोपाखाली अटक केली आहे.
मोहाली पोलिसांच्या सीआयए पथकाने आंतरराज्यीय शस्त्र पुरवठा करणाऱ्या एका मोठ्या टोळीचा पर्दाफाश केला आहे. प्राथमिक तपासातून या टोळीत सिकंदर शेखचा सहभाग असल्याचे उघड झाले आहे.
गुन्ह्याची पार्श्वभूमी आणि अटकेची प्रक्रिया:
24 ऑक्टोबर रोजी उत्तर प्रदेशचे रहिवासी असलेले दानवीर आणि बंटी हे दोन शस्त्रे घेऊन मोहालीत आले होते. त्यांनी ही शस्त्रे सिकंदर शेखकडे दिली आणि सिकंदरला ती नयागावातील कृष्ण कुमार उर्फ हॅपी गुर्जर याला पुरवायची होती. गुप्त माहितीच्या आधारावर पोलिसांनी एअरपोर्ट चौकातून दानवीर, बंटी आणि सिकंदर शेख या तिघांना शस्त्रांसह अटक केली. त्यानंतर 26 ऑक्टोबर रोजी कृष्ण कुमार उर्फ हॅपी गुर्जर यालाही अटक करण्यात आली.
पोलिसांनी दिलेल्या माहितीनुसार, सिकंदर शेखचे राजस्थानमधील कुख्यात पपला गुर्जर टोळीशी संबंध आहेत. ही टोळी शस्त्र तस्करी, खून आणि खंडणीसारख्या गंभीर गुन्ह्यांमध्ये सामील आहे. पोलिसांच्या मते, सिकंदर शेख या शस्त्र पुरवठा साखळीत मध्यस्थाची भूमिका बजावत होता. त्याने आपल्या प्रतिमेचा उपयोग शस्त्र विक्रीसाठी केला होता.
जप्त केलेला ऐवज:
पोलिसांनी अटक केलेल्या आरोपींकडून मोठा ऐवज जप्त केला आहे. जप्त केलेल्या ऐवजामध्ये 1 लाख 99 हजार रुपये रोख रक्कम, 4 (.32 बोर) पिस्तूल आणि 1 (.45 बोर) पिस्तूल (एकूण 5 अवैध बंदुका), जिवंत काडतुसे आणि स्कॉर्पिओ-एन आणि एक्सयूव्ही या 2 लक्झरी कारचा समावेश आहे. याप्रकरणी पंजाबमधील खरड पोलीस ठाण्यात आर्म्स ॲक्टखाली गुन्हा दाखल करण्यात आला आहे.
सिकंदरच्या कुटुंबाचा दावा आणि प्रतिक्रिया:
सिकंदरच्या अटकेनंतर त्याच्या कुटुंबीयांनी यावर बोलण्यास नकार दिला आहे. मात्र, “खोट्या गुन्ह्यात आमच्या मुलाला अडकवलं जात आहे” असा आरोप त्यांनी केला आहे.
कुस्ती क्षेत्रातील वाद:
सिकंदर शेख महाराष्ट्र केसरी 2023 च्या माती गटातील अंतिम लढतीत पंचांच्या वादग्रस्त निर्णयामुळे महाराष्ट्रात चर्चेत आला होता. त्यानंतर त्याने “मी जनतेच्या मनातील महाराष्ट्र केसरी आहे,” असे विधान केले होते. यानंतर 2024 मध्ये त्याने मानाची गदा जिंकून रुस्तम ए हिंद केसरीचा किताबही पटकावला होता.
हे देखील वाचा – Ajit Pawar : ‘निवडून यायचं होतं म्हणून…’; शेतकरी कर्जमाफीबाबत अजित पवारांचे मोठे वक्तव्य
