Krishi Vibhag New Logo : महाराष्ट्राच्या कृषी विभागाने तब्बल 38 वर्षांच्या दीर्घ कालावधीनंतर आपल्या अधिकृत ओळखीमध्ये मोठा बदल केला आहे. कृषी विभागाने मुख्यमंत्री देवेंद्र फडणवीस यांच्या उपस्थितीत आपल्या नवीन बोधचिन्हाचे आणि ‘शाश्वत शेती – समृद्ध शेतकरी’ या नव्या घोषवाक्याचे अनावरण केले.
नव्या युगातील कृषी विचारांचा आरंभ
कृषी मंत्री दत्तात्रय भरणे यांनी या बदलावर प्रतिक्रिया देताना सांगितले की, “महाराष्ट्राची शेती परंपरेशी जोडलेली असली तरी ती सतत नव्या दिशेने वाटचाल करत आहे. हे नवे बोधचिन्ह केवळ प्रतीक नाही, तर ते तंत्रज्ञान, पर्यावरणपूरक विकास आणि शेतकऱ्यांची शक्ती दर्शवणारा महाराष्ट्राच्या शेतीचा आधुनिक चेहरा आहे. हा बदल म्हणजे नव्या युगातील नव्या कृषी विचारांचा आरंभ आहे.”
बदलाची गरज का पडली?
कृषी विभागाचे जुने बोधचिन्ह मे 1987 मध्ये (म्हणजेच सुमारे 38 वर्षांपूर्वी) तयार करण्यात आले होते.
गेल्या साडेतीन दशकांत शेतीत तंत्रज्ञान, यांत्रिकीकरण, नैसर्गिक शेती, हवामान बदल आणि डिजिटल क्रांती यांसारखे मोठे मूलभूत बदल झाले आहेत. नव्या पिढीतील शेतकऱ्यांपर्यंत विभागाचा संदेश स्पष्टपणे पोहोचवण्यासाठी आणि आधुनिकतेला अनुसरून विभागाची ओळख अद्ययावत करण्याची गरज होती.
स्पर्धेतून निवड
या उद्देशाने कृषी विभागाने खुली स्पर्धा आयोजित केली होती, ज्यात कला महाविद्यालयाचे विद्यार्थी, प्राध्यापक, अभ्यासक आणि डिझायनर्स यांना प्रस्ताव सादर करण्याचे आवाहन करण्यात आले. या स्पर्धेत एकूण 761 बोधचिन्ह आणि 949 घोषवाक्य प्रस्ताव प्राप्त झाले. अंतिम निवड समितीच्या शिफारशीनंतर शासनाने 7 नोव्हेंबर 2025 रोजी या नव्या बोधचिन्ह आणि घोषवाक्याला अधिकृत मान्यता दिली.
विजेत्यांचा गौरव
या स्पर्धेतील विजेते:
- बोधचिन्ह स्पर्धेचे विजेते: विरेंद्र भाईदास पाटील (क्रेझी क्रिएशन्स, भुसावळ)
- घोषवाक्य स्पर्धेच्या विजेत्या: सिद्धी भारतराव देसाई (परभणी) कृषी मंत्री दत्तात्रय भरणे यांच्या हस्ते विजेत्यांचा सत्कार करण्यात आला.
नवे घोषवाक्य आणि बोधचिन्हाचा अर्थ
नव्या बोधचिन्हामध्ये ‘कृषी कल्याण कर्तव्यम्’ ही ओळ प्रमुखतेने दिली आहे, जी शेतीला केवळ व्यवसाय नव्हे तर समाजकल्याणाचे कर्तव्य मानण्याचा संदेश देते. तर ‘शाश्वत शेती – समृद्ध शेतकरी’ हे घोषवाक्य दीर्घकाळ टिकणाऱ्या आणि शाश्वत शेती पद्धतींद्वारे शेतकऱ्यांच्या आर्थिक व सामाजिक समृद्धीचे उद्दिष्ट दर्शवते.
वापराचे नियम
यापुढे कृषी विभागाच्या सर्व अधिकृत दस्तऐवज, प्रचारमाध्यमे, कृषी प्रदर्शनं आणि उपक्रमांमध्ये हे नवे बोधचिन्ह आणि घोषवाक्य वापरले जाईल. हे चिन्ह आणि घोषवाक्य कृषी विभागाची मालमत्ता असून, त्याचा अनधिकृत वापर करणाऱ्यांवर दंडात्मक कारवाई केली जाईल, अशी माहिती देण्यात आली आहे.
हे देखील वाचा – Pakistan Blast : इस्लामाबाद स्फोटानंतर पाक पंतप्रधानांचे भारतावर गंभीर आरोप; परराष्ट्र मंत्रालयाने दिले सडेतोड उत्तर
