Maharashtra Mega Bharti: राज्यातील बेरोजगार तरुणांसाठी एक आनंदाची बातमी समोर आली आहे. राज्य शासनाने ७० हजारांहून अधिक रिक्त पदे भरण्याचा मोठा निर्णय घेतला असून ही प्रक्रिया अत्यंत पारदर्शक आणि नव्या पद्धतीने राबवली जाणार आहे. मुख्यमंत्री देवेंद्र फडणवीस यांनी या मेगा भरतीसाठी आवश्यक कौशल्ये, पात्रता आणि कामाच्या स्वरूपानुसार सेवा प्रवेश नियमावलीत सुधारणा करण्याचे निर्देश प्रशासनाला दिले आहेत.
असे असेल भरतीचे स्वरूप
या महाभरतीमध्ये एकूण पदांची विभागणी दोन मुख्य गटांत करण्यात आली आहे:
- MPSC मार्फत भरती: महाराष्ट्र लोकसेवा आयोगाच्या माध्यमातून सुमारे 20,000 पदांची भरती केली जाईल.
- इतर पदे: आयोगाच्या कक्षेबाहेरील सुमारे 50,000 पदांसाठी स्वतंत्र प्रक्रिया राबवली जाईल.
सह्याद्री अतिथीगृह येथे झालेल्या उच्चस्तरीय बैठकीत मुख्यमंत्र्यांनी या प्रक्रियेचा आढावा घेतला. या सुधारित नियमावलीला लवकरच मंत्रिमंडळाच्या बैठकीत अंतिम मंजुरी दिली जाणार आहे.
भरती प्रक्रियेत डिजिटल क्रांती
उमेदवारांना कागदपत्रांच्या पडताळणीसाठी लांब रांगांमध्ये उभे राहावे लागू नये किंवा प्रक्रियेत उशीर होऊ नये, यासाठी मुख्यमंत्र्यांनी ‘डिजिटल व्हेरिफिकेशन मॉडेल’ विकसित करण्याच्या सूचना केल्या आहेत. अनावश्यक कागदपत्रांची अट रद्द करून ऑनलाईन प्रणालीवर अधिक भर दिला जाणार आहे. यामुळे संपूर्ण भरती प्रक्रिया जलद आणि भ्रष्टाचारमुक्त होण्यास मदत होईल.
देशासाठी ‘महाराष्ट्र मॉडेल’ मार्गदर्शक
पंतप्रधान नरेंद्र मोदी यांच्या उपस्थितीत झालेल्या मुख्यमंत्र्यांच्या परिषदेत महाराष्ट्र शासनाने मांडलेले मनुष्यबळ व्यवस्थापन मॉडेल सर्वाधिक कौतुकास्पद ठरले होते. पंतप्रधान मोदींनी इतर राज्यांनाही महाराष्ट्राचे हे सुधारणा मॉडेल स्वीकारण्याचे निर्देश दिले आहेत. प्रशासकीय सुधारणांच्या बाबतीत महाराष्ट्र आता देशासाठी दिशादर्शक ठरत असल्याचे मुख्यमंत्री फडणवीस यांनी यावेळी अभिमानाने नमूद केले.
या ७० हजार नव्या नियुक्त्यांमुळे सरकारी विभागांच्या कार्यक्षमतेत मोठी वाढ होईल आणि प्रशासकीय कामांना गती मिळेल, असा विश्वासही त्यांनी व्यक्त केला.
