Talathi Bharti Revenue Servants: राज्यातील महसूल सेवकांच्या (Revenue Servants) दीर्घकाळ प्रलंबित मागण्यांबाबत राज्य सरकारने अखेर सकारात्मक भूमिका घेतली आहे. महसूलमंत्री चंद्रशेखर बावनकुळे यांच्या पुढाकाराने मंत्रालयात झालेल्या एका उच्चस्तरीय बैठकीत महसूल सेवकांना तलाठी भरती प्रक्रियेत प्राधान्य देण्याचा महत्त्वपूर्ण प्रस्ताव मांडण्यात आला आहे.
Talathi Bharti: वेतनश्रेणीऐवजी ‘आरक्षण’ आणि ‘अतिरिक्त गुण’
महसूल सेवकांची प्रमुख मागणी चतुर्थ श्रेणीमध्ये (Class IV category) समावेश करून मानधनाऐवजी वेतनश्रेणी मंजूर करण्याची होती. मात्र, सध्याच्या शासकीय नियमांनुसार अशी वेतनश्रेणी लागू करणे शक्य नसल्याचे बैठकीत स्पष्ट करण्यात आले.
यावर पर्याय म्हणून महसूलमंत्र्यांनी महसूल सेवकांना न्याय देण्यासाठी एक महत्त्वाचा प्रस्ताव सूचवला:
- राखीव जागा: तलाठी भरतीमध्ये महसूल सेवकांसाठी काही जागा राखीव ठेवल्या जातील.
- अतिरिक्त गुण: ज्या सेवकांना 5 वर्षांहून अधिक महसूल सेवकाचा अनुभव आहे, त्यांना भरती प्रक्रियेत 25 अतिरिक्त गुण दिले जातील.
राज्याचे मुख्य सचिव राजेश मिना, अतिरिक्त मुख्य सचिव व्ही. राधा यांच्यासह अनेक वरिष्ठ अधिकाऱ्यांनी या प्रस्तावावर सकारात्मक प्रतिसाद दिला असून, या संदर्भात लवकरच शासन निर्णय (GR) जाहीर होण्याची शक्यता आहे. या निर्णयामुळे हजारो महसूल सेवकांच्या नियुक्ती आणि पदोन्नतीसंबंधीचा प्रश्न मार्गी लागणार आहे.
बैठकीतील महत्त्वाचे मुद्दे
महसूलमंत्री बावनकुळे यांच्या अध्यक्षतेखाली झालेल्या या बैठकीस मुख्य सचिव राजेश मिना, वित्त विभागाचे अप्पर मुख्य सचिव ओमप्रकाश गुप्ता, महसूल विभागाचे अप्पर मुख्य सचिव विकास खारगे, तसेच महसूल सेवक संघटनेचे पदाधिकारी उपस्थित होते.
पूरस्थितीच्या काळात काही महसूल सेवक संपावर असल्याने प्रशासनाला आलेल्या अडचणी बैठकीत नमूद करण्यात आल्या. ऑनलाईन सेवांमुळे कामाचा ताण कमी झाला असला तरी, प्रशासकीय काम अधिक परिणामकारक करण्यासाठी महसूल सेवकांनी जबाबदारीने वागावे, असे आवाहन महसूलमंत्र्यांनी केले.
महसूल सेवकांच्या इतर प्रलंबित मागण्यांवरही सकारात्मक तोडगा काढण्याचे आश्वासन महसूलमंत्र्यांनी दिले. यापूर्वीच त्यांच्या मानधनात वाढ करण्यात आली आहे.
हे देखील वाचा – ट्रम्प खोटे बोलले? पंतप्रधान मोदींशी कोणताही फोन झाला नाही; रशियाच्या तेल खरेदीच्या दाव्यावर भारताचे स्पष्टीकरण
