Maharashtra ZP Election Results 2026 : महाराष्ट्रातील जिल्हा परिषद आणि पंचायत समिती निवडणुकीच्या निकालांमध्ये अनपेक्षित उलथापालथ पाहायला मिळत असून, परभणी जिल्ह्यात प्रस्थापित नेतृत्वाला मतदारांनी मोठा कौल नाकारला आहे. लातूर नगरपालिकेत भाजपने अनुभवलेल्या घराणेशाहीच्या विरोधातील लाटेचे प्रतिबिंब आता परभणीच्या ग्रामीण राजकारणातही उमटले आहे. परभणीचे ज्येष्ठ नेते आणि भाजपचे माजी मंत्री सुरेश वरपुडकर यांच्या कुटुंबातील पाच सदस्य निवडणुकीच्या मैदानात होते, परंतु त्यांपैकी तब्बल चार जणांना पराभवाचा सामना करावा लागला आहे. मतदारांनी प्रस्थापित घराण्यातील उमेदवारांऐवजी सामान्य कार्यकर्त्यांना पसंती देत घराणेशाहीला स्पष्ट नकार दिल्याचे चित्र समोर आले आहे.
सुरेश वरपुडकर यांच्या कन्या सोनल देशमुख यांनी झरी जिल्हा परिषद गटातून ‘मशाल’ या चिन्हावर निवडणूक लढवली होती. मात्र, भाजपच्या दिलीप देशमुख यांनी त्यांचा पराभव करत विजय संपादन केला. वरपुडकर यांचे चिरंजीव समशेर वरपुडकर हेदेखील शिंगणापूर जिल्हा परिषद गटातून रिंगणात होते; परंतु तेथेही ‘मशाल’ चिन्हावर उभे राहिलेल्या पांडुरंग खिल्लारे यांनी समशेर यांचा पराभव केला. वरपुडकर यांच्या सुनबाई प्रेरणा वरपुडकर या दैठणा गटातून निवडणुकीसाठी उभ्या होत्या, तिथे काँग्रेसच्या ज्योत्स्ना गणेश घाडगे यांनी त्यांचा पराभव केल्याने वरपुडकर यांच्या घरातील तिन्ही मुख्य उमेदवारांना मतदारांनी नाकारले आहे.
लोहगाव जिल्हा परिषद गटात सुरेश वरपुडकर यांचे दोन पुतणे आमनेसामने ठाकले होते. यामध्ये काँग्रेसच्या ‘हात’ चिन्हावर निवडणूक लढवणारे अजित वरपुडकर यांनी भाजपचे उमेदवार ऐश्वर्य वरपुडकर यांचा पराभव केला. संपूर्ण निवडणुकीत वरपुडकर यांच्या कुटुंबातील ५ उमेदवारांपैकी केवळ एका जागेवर, म्हणजेच अजित वरपुडकर यांच्या रूपाने त्यांना समाधान मानावे लागले आहे. ही जागा काँग्रेसच्या चिन्हावर लढवली गेली होती, तर वरपुडकर यांच्या घरातील इतर सदस्य वेगवेगळ्या चिन्हांवर नशीब आजमावत होते.
परभणीच्या या निकालांनी हे स्पष्ट केले आहे की, केवळ मोठ्या घराण्यातील नाव किंवा राजकीय वारसा आता विजयाची खात्री देऊ शकत नाही. मतदारांनी सजगपणे सामान्य कुटुंबातील आणि लोकांशी नाळ जोडलेल्या उमेदवारांना निवडून दिले आहे. दिग्गज नेत्यांच्या कुटुंबातील सदस्यांचा झालेला हा पराभव जिल्ह्याच्या राजकारणात मोठी चर्चा घडवून आणणारा ठरला आहे. या निकालांमुळे परभणीतील सत्तेच्या समीकरणात आमूलाग्र बदल होण्याची शक्यता असून, आगामी काळात नेत्यांना घराणेशाहीपेक्षा जनसंपर्कावर अधिक भर द्यावा लागेल, असा स्पष्ट संदेश मतदारांनी दिला आहे.
