Mumbai Crime News : मुंबईतील वडाळा परिसरात एक धक्कादायक प्रकार समोर आला आहे, जिथे अर्बन कंपनी अॅपद्वारे बुक केलेल्या मसाज थेरपिस्टने बुकिंग रद्द केल्यानंतर एका महिला ग्राहकाला बेदम मारहाण (Wadala Crime) केल्याचा गंभीर आरोप आहे. या घटनेचा व्हिडिओ सध्या सोशल मीडियावर जोरदार व्हायरल होत आहे. पीडितेच्या तक्रारीवरून, वडाळा पोलिसांनी (Wadala Police station) या प्रकरणी गुन्हा देखल दाखल केला आहे. सध्या पोलीस या प्रकरणाचा अधिक तपास करत आहे.
सेशन रद्द केल्याने महिला थेरपिस्टने केली आगपाखड
मिळालेल्या माहितीनुसार, ४६ वर्षीय पीडित महिला हि तिच्या मुलासह वडाळा येथे राहते. पोलिसांकडे केलेल्या तक्रारीत तिने सांगितले आहे की, तिने फ्रोझन शोल्डरवर उपचार करण्यासाठी अर्बन कंपनी अॅपद्वारे मसाज सेवा बुक केली होती. एक महिला थेरपिस्ट ठरलेल्या वेळी तिच्या घरी आली, परंतु ती महिला तिच्या पद्धती आणि सोबत आणलेल्या मोठ्या मसाज बेडमुळे प्रचंड अस्वस्थ होती. दरम्यान, पीडित महिलेचा आरोप आहे की, जेव्हा तिने सेशन रद्द केले आणि परतफेड प्रक्रिया सुरू केली तेव्हा थेरपिस्टला प्रचंड राग आला आणि तिच्याशी गैरवर्तन करू लागले.
शाब्दिक वादाचे मोठ्या हाणामारीत रूपांतर, अडवणूक करणाऱ्या मुलालाही केली मारहाण
दरम्यान, या गोष्टीला घेऊन दोघांमध्ये वाद चिघळला आणि त्याचे रूपांतर थेट हाणामारीत झाल्याचे सांगितले. त्यात थेरपिस्टने तिचे केस ओढले, तिच्या चेहऱ्यावर जोरदार मुक्का मारला, तिला ओरबाडले आणि अमानुषपणे जमिनीवर ढकलले. पीडितेच्या मुलालाही, जो हस्तक्षेप करण्याचा प्रयत्न करत होता, त्याला देखील जोरदार मारहाण करण्यात आली.
आरोपी विरुद्ध वडाळा पोलीस ठाण्यात गुन्हा दाखल
घटनेदरम्यान, पीडितेने पोलिसांच्या हेल्पलाइन क्रमांक 100 वर फोन केला. माहिती मिळताच पोलीस घटनास्थळी पोहोचले, परंतु तोपर्यंत आरोपी थेरपिस्टने तिथून पळ काढला होता. त्यानंतर, पीडितेने स्थानिक पोलिस ठाण्यात या प्रकरणी तक्रार दाखल केली. पोलिसांनी आरोपीविरुद्ध एनसी (नॅशनल रजिस्टर ऑफ सिटिझन्स) देखील दाखल केली आहे. तपासादरम्यान, हे देखील उघड झाले की अॅपमध्ये आरोपी थेरपिस्टच्या नाव आणि ओळखीबाबत तांत्रिक त्रुटी होती, जी नंतर दुरुस्त केली गेली. या हल्ल्याचा व्हिडिओ सोशल मीडियावर व्हायरल झाल्यानंतर या घटनेला अधिक महत्त्व प्राप्त झाले आहे.
