Mumbai Metro 3 Aqua Line discount pass rates : मुंबईची नवी ओळख बनलेली मेट्रो-3 म्हणजेच ‘ॲक्वा लाईन’ आता प्रवाशांसाठी अधिक खिशाला परवडणारी ठरणार आहे. मुंबई मेट्रो रेल कॉर्पोरेशनने (MMRC) विद्यार्थी, पर्यटक आणि नियमित प्रवाशांसाठी विशेष सवलतीच्या पासची घोषणा केली आहे. हे सर्व पास ‘नॅशनल कॉमन मोबिलिटी कार्ड’ (NCMC) वर उपलब्ध असून याद्वारे प्रवाशांना मोठ्या सवलतींचा लाभ घेता येईल.
विद्यार्थ्यांना मिळणार मोठा दिलासा
शाळा आणि महाविद्यालयात जाणाऱ्या विद्यार्थ्यांचा प्रवास खर्च कमी करण्यासाठी मेट्रो प्रशासनाने विशेष पाऊल उचलले आहे. १२ वी पर्यंतच्या विद्यार्थ्यांसाठी हे नियम लागू असतील:
- सवलत: ४५ आणि ६० ट्रिपच्या पासवर थेट २५ टक्के सूट मिळेल.
- वैधता: या पासची मुदत ३० दिवसांसाठी असेल. यामुळे सुरक्षित आणि वातानुकूलित मेट्रो प्रवास विद्यार्थ्यांच्या आवाक्यात येणार आहे.
पर्यटकांच्या आनंदाला उधाण
मुंबई दर्शनसाठी येणाऱ्या पर्यटकांना आता वाहतूक कोंडीतून सुटका मिळवता येईल. पर्यटकांसाठी ‘अनलिमिटेड’ प्रवासाचे दोन पर्याय देण्यात आले आहेत:
- १ दिवसाचा पास: फक्त २८० रुपयांत दिवसभर कितीही वेळा प्रवास करा.
- ३ दिवसांचा पास: ७०० रुपयांत तीन दिवस अमर्यादित प्रवासाची मुभा.
दिव्यांग आणि नोकरदार वर्गासाठी ऑफर्स
मेट्रोने सामाजिक बांधिलकी जपत दिव्यांग प्रवाशांनाही ४५ आणि ६० ट्रिपच्या पासवर २५ टक्के सवलत दिली आहे. तसेच, दररोज प्रवास करणाऱ्या नोकरदार वर्गाला एनसीएमसी कार्ड वापरल्यास १० ते १५ टक्क्यांपर्यंत सूट मिळणार आहे. ४५ ट्रिपसाठी १० टक्के आणि ६० ट्रिपसाठी १५ टक्के सवलत लागू असेल.
डिजिटल पेमेंटला प्रोत्साहन देण्यासाठी आणि प्रवाशांचा वेळ वाचवण्यासाठी हे सर्व पास मेट्रोच्या अधिकृत ॲपवरूनही हाताळता येणार आहेत.
