Murlidhar Mohol : पुणे लोकसभा मतदारसंघाचे लोकप्रतिनिधी आणि केंद्रीय राज्यमंत्री मुरलीधर मोहोळ यांच्यावर पुण्यातील एका खाजगी रुग्णालयात आज गुडघ्याची यशस्वी शस्त्रक्रिया पार पडली. सुमारे तीन दशकांपूर्वी कुस्तीच्या आखाड्यात झालेली दुखापत पुन्हा बळावल्याने डॉक्टरांनी त्यांना तातडीने शस्त्रक्रियेचा सल्ला दिला होता. या वैद्यकीय उपचारानंतर त्यांना आता किमान एक महिना सक्तीच्या विश्रांतीची आवश्यकता भासणार आहे.
कोल्हापूरच्या तालमीतील अधुरे स्वप्न आणि जुनी जखम
मुरलीधर मोहोळ यांनी सोशल मीडियाच्या माध्यमातून आपल्या भावना व्यक्त करताना या दुखापतीची पार्श्वभूमी सांगितली. २९ वर्षांपूर्वी कोल्हापूर येथे कुस्ती खेळत असताना त्यांच्या गुडघ्याला अत्यंत गंभीर इजा झाली होती. ही दुखापत इतकी मोठी होती की, त्यामुळे त्यांचे कुस्तीचे स्वप्न अधुरे राहिले आणि त्यांना कुस्ती कायमची सोडावी लागली. गेली अनेक वर्षे सार्वजनिक जीवनात सक्रिय असताना त्यांनी या त्रासाकडे दुर्लक्ष केले; परंतु अलीकडच्या काळात सततचा प्रवास आणि कामाच्या व्यापा मुळे ही जुनी दुखापत पुन्हा उफाळून आली. अखेर डॉक्टरांनी शस्त्रक्रियेशिवाय दुसरा पर्याय नसल्याचे स्पष्ट केले.
जनसेवेत पडणाऱ्या खंडाबद्दल भावुक प्रतिक्रिया
सध्या संसदेचे अधिवेशन सुरू असून, देशपातळीवरील जबाबदाऱ्या आणि पुणे मतदारसंघातील नागरिकांच्या भेटीगाठी असे कामाचे मोठे नियोजन समोर आहे. अशा महत्त्वाच्या काळात ही शस्त्रक्रिया करावी लागल्याने मोहोळ यांनी हळहळ व्यक्त केली. विशेषतः आगामी ‘महाराष्ट्र केसरी’ कुस्ती स्पर्धेच्या आयोजनात सक्रिय सहभाग घेता येणार नसल्याची खंत त्यांनी बोलून दाखवली. “शारीरिक वेदनांपेक्षा जनसेवेच्या कामात पडणाऱ्या या खंडामुळे मला अधिक त्रास होत आहे,” अशी भावुक पोस्ट त्यांनी लिहिली आहे.
महिन्याभरानंतर पुन्हा जोमाने पुनरागमन
शस्त्रक्रियेनंतर मुरलीधर मोहोळ पुढील सात ते आठ दिवस तज्ज्ञ डॉक्टरांच्या देखरेखीखाली रुग्णालयातच उपचार घेतील. त्यानंतर त्यांना घरी विश्रांती घेण्याचा सल्ला देण्यात आला आहे. या काळात ते प्रत्यक्ष जनसंपर्कात नसले, तरी तंत्रज्ञानाच्या माध्यमातून संपर्कात राहण्याचा प्रयत्न करतील. “तुमच्या शुभेच्छा आणि आशीर्वादाच्या बळावर मी लवकरच पूर्णपणे बरा होईन आणि महिन्याभरानंतर पहिल्यापेक्षा अधिक जोमाने तुमच्या सेवेसाठी पुन्हा हजर होईन,” असा विश्वास त्यांनी आपल्या समर्थकांना दिला आहे.
