Nashik Crime : नाशिकरोड येथील मध्यवर्ती कारागृहात (Nashik Road Central jail) शिक्षा भोगत असलेल्या एका कैद्याने गळफास घेऊन आत्महत्या केल्याची धक्कादायक उघडकीस आली आहे. शिवदास भालेराव वय वर्ष ५८, कैदी क्रमांक यूटी-८०२) असे मृत्युमुखी पडलेल्या कैद्यांचे नाव आहे.
सिन्नर तालुक्यातील रहिवासी असलेले भालेराव याला एका अल्पवयीन मुलीवर बलात्कार केल्याप्रकरणी पोलिसांकडून अटक करण्यात आली होती.या गुन्ह्यात त्याला न्यायालयीन कोठडी सुनावण्यात आली होती आणि जून २०२४ पासून तो नाशिकरोड मध्यवर्ती कारागृहात केलेल्या कृत्यांची शिक्षा भोगत होता.
भालेराव याने कारागृहातील एका ठिकाणी गळफास घेतल्याचे कारागृह प्रशासनाच्या निदर्शनास आले. घटनेची माहिती मिळताच कारागृहातील पोलीस अंमलदारांनी तातडीने या कैद्याला खाली उतरवून शासकीय जिल्हा रुग्णालयात दाखल केले. मात्र, तेव्हा वैद्यकीय अधिकाऱ्यांनी तपासणी करून कैद्याला मृत घोषित करण्यात आले.
या घटनेची नाशिकरोड पोलीस ठाण्यात (Nashik Road Police Station) अकस्मात मृत्यू अशी नोंद केली आहे. आत्महत्येचे नेमके कारण अद्याप अस्पष्ट आहे. पोलीस आणि कारागृह प्रशासन या प्रकरणाचा सखोल तपास करीत आहेत.
दरम्यान, काही दिवसांपूर्वी नाशिकरोड येथील मध्यवर्ती कारागृहातील काही कैदी सुरक्षेचा फज्जा उडवत अंमली पदार्थांचे सेवन करत असल्याचा धक्कादायक व्हिडीओ सोशल मीडियावर व्हायरल झाला होता. या प्रकाराची दखल घेत नाशिकरोड पोलिसांनी ५ ते ६ कैद्यांविरोधात अजून एक गुन्हा दाखल करण्यात आला. पोलीस तपासात हे व्हिडीओ मागील वर्षीचे असल्याचे निदर्शनात आले होते. मात्र, इतक्या गंभीर प्रकारानंतरही कारागृह प्रशासनाकडून वर्षभरात कोणतीही ठोस कारवाई झाली नसल्याचे दिसून आले. त्यामुळे प्रशासनाच्या भूमिकेबाबत अनेक प्रश्नचिन्ह उपस्थित राहताना दिसत आहेत.
हे देखील वाचा – Uddhav Thackeray : उद्धव ठाकरेंचा मराठवाडा दौरा..
