Padma Awards 2026: प्रजासत्ताक दिनाच्या पूर्वसंध्येला केंद्र सरकारकडून देशातील सर्वोच्च नागरी पुरस्कारांची घोषणा करण्यात आली आहे. यावर्षीच्या यादीत महाराष्ट्राचे स्पष्ट वर्चस्व दिसून येत असून राज्याला एकूण 15 पद्म पुरस्कार मिळाले आहेत. यामध्ये चित्रपटसृष्टीतील ‘ही-मॅन’ अशी ओळख असलेले दिग्गज अभिनेते धर्मेंद्र सिंह देओल यांना मरणोत्तर ‘पद्मविभूषण’ देऊन गौरवण्यात आले आहे.
यावर्षीच्या एकूण पुरस्कार विजेत्यांमध्ये 19 महिलांचा समावेश असून 16 व्यक्तींना मरणोत्तर सन्मान देण्यात आला आहे. तसेच परदेशी आणि अनिवासी भारतीय श्रेणीतील 6 मान्यवरांचाही यात समावेश आहे.
महाराष्ट्रातील पद्मभूषण पुरस्काराचे मानकरी
राज्यातून तीन दिग्गज व्यक्तींना त्यांच्या क्षेत्रातील अमूल्य योगदानासाठी ‘पद्मभूषण’ जाहीर झाला आहे:
- अलका याज्ञिक (कला): भारतीय पार्श्वसंगीतात अनेक दशके दिलेल्या योगदानाबद्दल त्यांचा गौरव करण्यात आला आहे.
- पीयूष पांडे (मरणोत्तर – कला): जाहिरात विश्वात भारताचे नाव जागतिक स्तरावर नेणाऱ्या या व्यक्तिमत्त्वाचा मरणोत्तर सन्मान करण्यात आला आहे.
- उदय कोटक (व्यापार आणि उद्योग): बँकिंग क्षेत्रातील त्यांचे योगदान आणि आर्थिक विकासातील भूमिकेसाठी हा पुरस्कार देण्यात आला आहे.
राज्यातील पद्मश्री पुरस्काराची मोहोर
विविध क्षेत्रांत उल्लेखनीय कामगिरी करणाऱ्या महाराष्ट्रातील 11 मान्यवरांना ‘पद्मश्री’ पुरस्काराने सन्मानित करण्यात आले आहे:
- क्रीडा: भारतीय क्रिकेट संघाचा माजी कर्णधार रोहित शर्मा याला खेळातील योगदानासाठी पद्मश्री जाहीर झाला आहे.
- कला: प्रसिद्ध अभिनेता आर. माधवन, तमाशा सम्राट रघुवीर खेडकर, पालघरचे प्रसिद्ध तारपा वादक भिकल्या लाडक्या धिंडा आणि अभिनेते सतीश शहा (मरणोत्तर) यांचा समावेश आहे.
- वैद्यकीय आणि कृषी: नवजात बालकांच्या आरोग्यासाठी काम करणाऱ्या अर्मिडा फर्नांडिस आणि शेती क्षेत्रातील प्रयोगांसाठी श्रीरंग देवबा लाड यांना सन्मानित केले गेले आहे.
- उद्योग आणि विज्ञान: उद्योजक अशोक खाडे, सत्यनारायण नुवाल, वैज्ञानिक जुझेर वासी यांनाही हा बहुमान मिळाला आहे.
- समाजकार्य: जनार्दन बापुराव बोथे यांना त्यांच्या निस्वार्थ सामाजिक सेवेसाठी पद्मश्री जाहीर झाला आहे.
हे पुरस्कार कला, समाजसेवा, विज्ञान, व्यापार आणि क्रीडा यांसारख्या विविध क्षेत्रांतील उत्कृष्ट सेवेसाठी दिले जातात. झारखंडचे माजी मुख्यमंत्री शिबू सोरेन यांनाही यावर्षी मरणोत्तर पद्मभूषण देऊन गौरवण्यात आले आहे.
